जेठ २८ धनगढी । अछाममा बालविवाह गरेका किशोर–किशोरीलाई प्रहरीले नियन्त्रणमा लिएको छ । मंगलबार बिहान करिब १० बजे मंगलसेनका एक जना किशोरले किशोरीलाई भगाएर मन्दिरमा सिन्दुर हाली बालविवाह गरेको अबश्थामा प्रहरीले उनीहरुलाई नियन्त्रणमा लिएको हो ।
विवाह गरेर घर फर्कँदै गरेका किशोर–किशोरीलाई स्थानीयले मेल्लेख प्रहरी चौकीमा जानकारी गराए पछि प्रहरी टोलीले तत्काल नियन्त्रणमा लिएको हो । जिल्ला प्रहरी कार्यालय अछामले बालविवाहमा संलग्न दुवै जना किशोर–किशोरीलाई नियन्त्रणमा लिएर अनुसन्धानका लागि जिल्ला प्रहरी कार्यालयमा ल्याइएको जानकारी गराएको हो ।
जिल्ला प्रहरी कार्यालय अछामका प्रवक्ता प्रहरी नायव उपरीक्षक ईश्वरी प्रसाद भण्डारीले उनीहरू विरुद्ध बालविवाह सम्बन्धी अपराध अन्तर्गत मुद्दा दर्ता गरिएको जानकारी गराए । पाँच दिनको म्याद थप गरी अनुसन्धान प्रक्रिया अघि बढाइएको उनले जानकारी गराए ।
बालविवाह कानुन विपरीतको कार्य भएकाले यस प्रकारका घटनामा शून्य सहनशीलताको नीति अपनाएको उनले बताए ।
नेपालको कानुन अनुसार २० वर्ष नपुगी विवाह गर्नु वा गराउनु दण्डनीय अपराध हो । बाल विबाह गर्नु हुदैन भनि स्थानीय तहसँग समन्वय गरी विभिन्न संघ संसथाहरुले सचेतनामूलक कार्यक्रमहरू सञ्चालन गरिरहेका भए पनि बालविवाह हुने क्रम रोकिएको छैन ।
