चैत्र १३ धनगढी । कैलाली भन्सार कार्यालयले दोस्रो चौमासिकमा लक्ष्य अनुसार राजश्व सकंलन गर्न सकेको छैन् । चालु आर्थिक वर्ष २०८१÷०८२ को पहिलो चौमासिकमा राजश्व संकलन गर्ने नसकेको भन्सार कार्यालयले दोस्रो चौमासिक मंसिर देखि फागुन मसान्त सम्ममा पनि लक्ष्य अनुसार राजश्व संकलन गर्न नसकेको हो ।
माल सामान आयात नहुँदा राजश्व संकलन हुन नसकेको कैलाली भन्सार कार्यालयका भन्सार अधिकृत तेजबहादुर रावलले बताए । धनगढी आउने मालवस्तु पनि नेपालगन्ज र बीरगन्जबाट आइरहेकाले मागको आधारमा नआइरहेको उनले बताए ।
पेट्रोलियम पदार्थले गर्दा अलि कति वृद्धि भएपनि भन्सार राजश्व इन्डियन कस्टममा पनि अवरोध नै रहेको उनले बताए । कैलाली भन्सार कार्यालयले चालु आर्थिक वर्षको पहिलो चौमासिक साउन देखि कार्तिक सम्म लक्ष्य भन्दा एक अर्ब नौ करोड ९४ लाख ६७ हजारले कम राजश्व संकलन गरेको थियो ।
पहिलो चौमासिकमा तीन अर्ब ५१ करोड ३३ लाख ६२ हजार लक्ष्य रहेकोमा कैलाली भन्सारले दुई अर्ब ४१ करोड ३८ लाख ९५ हजार राजश्व संकलन गरेको थियो । कैलाली भन्सार कार्यालयले गत आर्थिक वर्षको तुलनामा चालु आर्थिक वर्षको राजश्व संकलनको लक्ष्य कम रहेको छ । तर पनि कार्यालयले लक्ष्य अनुसारको राजश्व संकलन गर्न सकेको छैन ।
कैलाली भन्सार कार्यालयले चालु आर्थिक बर्षमा ११ अर्ब १६ करोड २६ लाख ३० हजार राजश्व संकलन गर्ने लक्ष्य लिएको छ । भन्सार कार्यालयको चालु आर्थिक वर्ष २०८१÷०८२ को दोस्रो चौमासिकमा सात अर्ब १३ करोड ६१ लाख ४७ हजार लक्ष्य रहेकोमा पाँच अर्ब ३४ करोड १९ लाख ४१ हजार मात्रै राजश्व संकलन भएको छ । संकलित राजश्व वार्षिक लक्ष्यको ४७.८६ प्रतिशत हो ।
भन्सार कार्यालयले गत आर्थिक वर्ष २०८०÷०८१ को दोस्रो चौमासिकमा पनि लक्ष्य अनुसार राजश्व संकलन गर्ने सकेको थिएन । गत आर्थिक वर्षको दोस्रो चौमासिकमा सात अर्ब ५६ करोड १६ लाख ५६ हजार लक्ष्य रहेकोमा पाँच अर्ब एक करोड ३० लाख २० हजार मात्रै राजश्व असुली गरेको थियो ।
भन्सार अधिकृत रावलका अनुसार गत वर्षको भन्दा यस वर्ष लक्ष्य नपुगेको भए पनि राजश्व संकलनमा वृद्धि नै भएको छ । माल वस्तु आयात हुन सकेन भने वार्षिक लक्ष्य अनुसार राजश्व संकलन हुन नसक्ने उनले बताए । राजश्व संकलनमा वृद्धि गर्नका लागि आफूहरुले भन्सार क्षेत्र भन्दा बाहिरबाट आयात हुने माल वस्तुहरुलाई नियन्त्रण गर्नका लागि गस्ती समेत गरिरहेको उनले बताए ।
खुल्ला सिमानाका कारण राजश्व चुवावट हुँदा पनि लक्ष्य अनुसार राजश्व संकलन हुन नसकिरहेको उनले बताए । चालु आर्थिक वर्षको राजश्व संकलन लक्ष्य गत वर्षको तुलनामा ४१ अर्ब १९ करोड आठ लाख ४० हजार कम हो ।
गत आर्थिक वर्ष २०८०÷०८१ मा ११ अर्ब ५८ करोड २४ लाख ७० हजार राजश्व संकलनको वार्षिक लक्ष्य रहेकोमा सात अर्ब ९१ करोड ८० लाख ६८ हजार मात्रै राजश्व संकलन भएको थियो । जुन लक्ष्य भन्दा झण्डै ३१ दशमलव ६४ प्रतिशत कम भएको बताउदै उनले ६८ दशमलव ३६ प्रतिशत मात्रै राजश्व असुली भएको बताए ।
