चैत्र १२ धनगढी । कैलाली र कञ्चनपुरका विभिन्न स्थानबाट ६ लाख ८ हजार ४ सय ७० रुपैया मूल्य बराबरको अवैध सामान बरामद गरिएको छ ।
कैलालीको धनगढी उपमहानगरपालीका वडा नम्बर–२ मिलन चोक र सिसमबारी, धनगढी उपमहानगरपालीका वडा नम्बर–३ बिशाल नगर, गोदावरी नगरपालीका वडा नम्बर–४ वनदेवी मन्दिर नजिक, भजनी नगरपालीका वडा नम्बर–५ कुटी, भजनी नगरपालीका वडा नम्बर–९ पहलवानपुर स्थित झुलुङ्गे पुल नजिक र टीकापुर नगरपालीका वडा नम्बर–९ खग्रौला सडक खण्डबाट अबैंध रुपमा भारतबाट भन्सार छली गरि ल्याएका अन्दाजी ४ लाख ७३ हजार ८ सय १० रुपैया मूल्य बराबरका भन्सार छलीका सामान बरामद गरिएको हो ।
भन्सार छलीको प्याज, चिनी, बिडी, सुर्ती, नरिवल, मसला, कारबन तेल, मटर, क्याण्डी, केक पाउडर, स्टिल तथा प्लाष्टिकका भाँडा वर्तन, बदाम, पेय पदार्थ, ब्याट्री, मोटर पाईप, ग्रिस वायल, प्लाष्टिक झिल्ली, सिद्रा माछा, कस्मेटिक लगायतका सामान जिल्ला प्रहरी कार्यालय कैलाली मातहत कार्यालयबाट खटिएको प्रहरी गस्ती टोलीले बेबारिसे अवस्थामा सोमवार फेला पारी नियन्त्रणमा लिएको प्रहरीले जानकारी गराएको हो ।
त्यसैगरी कञ्चनपुरको भीमदत्त नगरपालिका वडा नम्बर–१० भन्सार कार्यालय नजिक र दोधारा चाँदनी नगरपालिका वडा नम्बर–१ पशुपति टोलबाट अबैंध रुपमा भारतबाट भन्सार छली गरि ल्याएका अन्दाजी १ लाख ३४ हजार ६ सय ६० रुपैया मूल्य बराबरका सामान बरामद गरिएको छ ।
जिल्ला प्रहरी कार्यालय कञ्चनपुर मातहत कार्यालयबाट खटिएको प्रहरी गस्ती टोलीले पेय पदार्थ, बिडी, तिलको तेल, कपडा, जुत्ता, हार्डवेयर, किराना लगायतका सामान बेबारिसे अवस्थामा फेला पारी नियन्त्रणमा लिएको हो । त्यसैगरी दार्चुलामा भन्सार छलीको ६ पेटी बिडी बरामद गरिएको छ ।
लेकम गाउँपालिका वडा नम्बर–१ स्थित चौलानी नदीको किनारबाट अबैंध रुपमा भारतबाट भन्सार छली गरि ल्याएका अन्दाजी १ लाख ८० हजार मूल्य बराबरको ६ पेटी बिडी इलाका प्रहरी कार्यालय गोकुलेश्वरबाट खटिएको प्रहरी गस्ती टोलीले बेवारिसे अवस्थामा फेला पारी नियन्त्रणमा लिएको हो ।
