फागुन २८ धनगढी । जिल्ला प्रशासन कार्यालय कैलालीले मर्यादित रुपमा होली पर्व मनाउन जिल्लावासीलाई आग्रह गरेको छ । प्रशासनले बुधबार सार्वजनिक सूचना जारी गरेर जिल्लावासीलाई मर्यादित रुपमा होली पर्व मनाउन आग्रह गरेको हो ।
सहायक प्रमुख जिल्ला अधिकारी किरण जोशीले जारी गरेको सूचनामा होली मनाउने नाममा अवाञ्छित गतिविधि नगर्न सबैलाई आग्रह गरिएको छ । त्यस्तो गरेको पाइएमा प्रचलित कानुन अनुसार कारबाही गरिने जारी गरिएको सूचनामा उल्लेख गरिएको छ ।
प्रशासनले जथाभावी रङ लगाउने, कोही कसैको इच्छा विपरित हानिकारक वस्तु दल्ने कार्य नगर्न आग्रह गरेको छ । प्लास्टिकजन्य लोला तथा पानी छ्याप्ने, मादक पदार्थ सेवन गरी सवारी चलाउने, बाटोमा हिँड्ने व्यक्तिलाई अभद्र व्यवहार गर्ने, नसालु पदार्थ सेवन गरी सार्वजनिक स्थलमा नाचगान तथा होहल्ला नगर्न प्रशासनले आग्रह गरेको छ ।
डोरीले बाटो छेकेर पैसा उठाउने, दुःख हैरानी दिने, बाटो अवरोध गरी सवारी साधनबाट रकम असुल्ने जस्ता सार्वजनिक शान्ति, सुव्यवस्थामा खलल पु¥याउने खालका कानुन विपरितका क्रियाकलाप नगर्न र नगराउन प्रशासनले आग्रह गरेको छ ।
साथै, बेलुकी ९ बजेसम्म मात्रै सभ्य, मर्यादित, हर्षोल्लास पूर्वक पर्व मनाउन अपिल गरिएको छ । कोही कसैले कानुनको बर्खिलाप हुने क्रियाकलाप गरेको पाइएमा कानुन बमोजिम सजाय हुने सूचनामा उल्लेख गरिएको छ ।
