फागुन १३ धनगढी । कैलालीको धनगढी उपमहानगरपालिका वडा नम्बर–२ सन्तोषी टोलमा रहेको बायोग्यास प्लान्ट पूर्ण क्षमतामा सञ्चालनमा आएको छ ।
वैकल्पिक ऊर्जा प्रवद्र्धन केन्द्रसँगको सहकार्यमा देव ट्रेनिङ एन्ड म्यानेजमेन्ट सेन्टरले दैनिक ३० हजार किलो सड्ने र दुर्गन्ध फैलाउने फोहर व्यवस्थापन गर्दै आएको छ ।
बायोग्यास प्लान्टले खपत गर्नेमध्ये दैनिक करिब आठ हजार किलो फोहरमैला धनगढी उपमहानगरले उपलब्ध गराउने गरेको देव ट्रेनिङ एन्ड म्यानेजमेन्ट सेन्टरका सञ्चालक रवीनकान्त पन्तले बताए । उनले बाँकी फोहर गौशाला, कुखुरा फार्म आदिबाट सङ्कलन गरेर ल्याउने गरेको बताए ।
घरबाट निस्कने तरकारी, खानाजन्य फोहर, सडेगलेका फलफूल, गोबर, कुखुराको सुली लगायत कुहिने फोहर प्रयोग गरेर बायोग्यास प्लान्टले बायोग्यास र गोबर मल उत्पादन गरिरहेको उनले बताए ।
बायोग्यास प्लान्टबाट दैनिक ३० हजार किलो फोहरलाई व्यवस्थापन गरी दैनिक तीन हजार पाँच सय किलो जैविक मल र एक हजार किलो बायोमिथेन ग्यास उत्पादन गर्दै आएको पन्तले जानकारी गराए ।
उत्पादित ग्यासको बजारीकरणको प्रयास भइरहेको उनले बताए । कम्पनीले प्रदेश सरकारसँग मिलेर उत्पादित ग्यास पाइपलाइनबाट घरघरमा पु¥याउन प्रक्रिया सुरु गरेको बताईएको छ ।
वैकल्पिक ऊर्जा प्रवद्र्धन केन्द्रको ‘बेस्ट टु इनर्जी प्रोजेक्ट’ अन्तर्गत २० करोड ८४ लाख लागतमा स्थापना गरिएको ग्यास प्लान्ट गत वर्षबाट सञ्चालनमा आएको हो । कूल लागत मध्ये ४० प्रतिशत वैकल्पिक ऊर्जा प्रवद्र्धन केन्द्र र ६० प्रतिशत देव ट्रेनिङ एन्ड म्यानेजमेन्ट सेन्टरले लगानी गरे पन्तले बताए ।
प्लान्ट स्थापनाका लागि जग्गा भने उपमहानगरपालिकाले प्रदान गरेको उनले बताए । बायोग्यास प्लान्ट सञ्चालनमा आए पछि उपमहानगरलाई फोहरमैला व्यवस्थापन गर्न सहज भएको छ ।
पूर्ण क्षमतामा सञ्चालनमा आए पछि बायोग्यास प्लान्टले दैनिक करिब ३० हजार किलोसम्म फोहरमैलाको प्रयोगबाट एक हजार किलो ग्यास उत्पादन गर्दै आएको उनले जानकारी गराए ।
