फागुन १३ धनगढी । कैलालीमा केराको थामबाट उत्पादित रेशा र त्यसबाट निर्माण गरिएका हाते सामग्रीको खपत बढ्दै गएको छ । टीकापुर नगरपालिका वडा नम्बर–८ स्थित धनसिहपुर एकता समाज बचत तथा ऋण सहकारी संस्थाले केराको थामबाट रेशा उत्पादन गरी रेशाबाट बनाइएका सामग्रीको ख पत बढ्दै गएको हो ।
एक वर्षअघि स्थापना भएको उद्योगले केराको रेशा उत्पादन गरेर त्यसबाट टोपी, झोला, पेन होल्डर, कपडा, बस्नका लागि प्रयोग हुने चटाई लगायतका सामग्री निर्माण गर्ने गरेको सहकारीले जनाएको छ । सहकारीका व्यवस्थापक रामकृष्ण चौधरीले एक वर्षदेखि उद्योगले केराको थाम कृषकबाट निःशुल्क ल्याउने गरेको बताउदै दैनिक १० वटा थामबाट एक केजी रेशा उत्पादन हुने गरेको बताए ।
एक केजी रेशाबाट १५ वटासम्म टोपी बनाउन सकिने बताउदै उनले सहकारीले प्रतिटोपी एक हजार र पेन होल्डरको तीन सयमा बिक्री गर्ने गरेको बताए । सहकारीलाई उत्पादित सामग्री बिक्रीका लागि बजारको अभाव नभएको उनले बताए । सहकारीले बजारको माग अनुसार उत्पादन गर्न नभ्याएकोे बताउदै उनले उत्पादित सामग्री र रेशा काठमाडौँबाट धेरै माग भइरहेको बताए ।
काठमाडौँका उद्योगले कच्चा पदार्थ जति सकिन्छ पठाउनु भनिरहेको बताउदै चौधरीले माग अनुसार दिन नसकेको बताए । सहकारीको उद्योगमा १० जना महिला काम गरिरहेको बताउदै उनले जसमा पाँच जनाले केराको रेशाबाट हाते सामग्री बनाउन नियमित काम गरिरहेको बताए ।
घर सजावट तथा प्रयोगमा ल्याउन सकिने विभिन्न सामग्री बनाउने गरेको बताउदै उनले निर्माण गरिएका सामग्रीको खपत कैलालीमै भइरहेको बताए । मेला महोत्सवमा समेत उद्योगले उत्पादन गरेका सामग्री प्रदर्शनमा राखिदीन माग आउने गरेको उनले जानकारी गराए । केराको रेशा उत्पादन पछि खेर जाने सामग्री मलका रुपमा प्रयोग गर्न सकेमा अझ राम्रो हुने उनले बताए ।
वडा नम्बर ८ का वडाध्यक्ष दीर्घबहादुर ठकुल्लाले सहकारीले अब कपडा बनाउने धागो उत्पादन गर्न खोजिरहेको बताउदै ’धागो बनाउन सकेमा राम्रो फाइदा लिन सकिने बताए । टीकापुर नगरपालीका वडा नम्बर –६ का वडाध्यक्ष बलिराम चौधरीले आफूले पनि झोला किनेको बताउँदै कच्चा पदार्थ प्रसस्त पाइने भएकाले यसलाई विस्तार गर्नुपर्ने बताए ।
टीकापुर केराको पकेट क्षेत्र भएकाले केराको थाम किन्न पर्दैन, निःशुल्क पाइन्छ’,खेर गइरहेको केराको थामबाट धेरै सामग्री बनाउन सकिने रहेछ । यसलाई थप लगानी गरी विस्तार गर्नुपर्छ उनले भने ।
दिगो विकास समाज भजनीका अधिकृत विनोद शाहले सरकारले एक सहकारी, एक उद्योगको नीति लिएका बेला सहकारीले स्थापना गरेको उद्योग मार्फत किसान तथा महिला किसानलाई रोजगारीसँग जोड्ने कार्यलाई थप व्यवस्थापन गर्नुपर्ने बताए ।
केराको पटेक क्षेत्र भएकाले केराबाट महिला सदस्य तथा किसानलाई फाइदा भएको बताउदै उनले स्थानीयस्तरमै पाइने कच्चा पदार्थ प्रयोग गरी सहकारीका शेयर सदस्यले रोजगारीको अवसर पाउनु राम्रो उपलब्धि भएको बताए ।
