माघ १० धनगढी । नेपाली कांग्रेस गौरीगंगा नगरपालिकाको सम्मेलन बुधबार मसुरियामा सम्पन्न भएको छ । नगर सभापति पहल विक्रम चन्दको अध्यक्षतामा सम्पन्न कार्यक्रमको प्रमुख अतिथि प्रदेश महामन्त्री नरनारायण शाह (मनु) रहेका थिए ।
महामन्त्री शाहले कैलालीमा कांग्रेसको संगठनले अपेक्षित गति लिन नसकेको उल्लेख गर्दै सरकारमा सहभागी हुँदा जनताका सवालहरूलाई प्राथमिकतामा राख्न नेतृत्वले ध्यान दिनुपर्ने बताए । उनले पार्टी संगठन धनगढी केन्द्रित भई बाहिरी क्षेत्रहरूमा भाषणमा मात्र सीमित भएको बताए ।
उनले संगठन विस्तार र क्रियाशील सदस्यता नवीकरणमा समस्या रहेको भन्दै नेताहरूले आफ्ना वरपरका व्यक्तिलाई मात्र सिफारिस गरेर सदस्यता वितरण गर्दा धेरै सदस्यहरूले नवीकरण नगरेको बताए ।
नगर सम्मेलनमा राज्यमन्त्री प्रकाश बम, प्रदेश सभा सदस्य तुलसी देवकोटा, प्रदेश प्रवक्ता सुरत रावत, प्रदेश सदस्य रामबहादुर देउवा, जिल्ला उपसभापती खेम चौधरी, क्षेत्रीय सभापति बसन्त रोकाया, युवा नेता लोकराज पाण्डेय लगायतका नेताहरूले शुभकामना मन्तव्य ब्यक्त गरेका थिए ।
कार्यक्रममा सहभागी नेताहरूले पार्टीको संगठनलाई सुदृढ बनाउँदै स्थानीयस्तरका समस्याहरूको समाधानमा क्रियाशील बन्नुपर्ने बताएका थिए ।
