पौष २८ धनगढी । कैलालीका प्रमुख जिल्ला अधिकारी गोगन बहादुर हमालले देशको अर्थतन्त्रमा उद्योगको महत्वपूर्ण भूमिका रहेको बताएका छन् । कैलाली उद्योग वाणिज्य संघले आइतबार धनगढीमा आयोजना गरेको स्वागत तथा भेटघाट कार्यक्रममा बोल्दै प्रमुख जिल्ला अधिकारी हमालले यस्तो बताएका हुन् ।
उद्योगहरु जुन गतिमा अगाडि बढ्नुपर्ने हो, त्यो गतिमा बढ्न नसकेको बताउदै उनले सरकारले उद्योग क्षेत्रलाई अगाडी बढाउने नीति अवलम्बन गरेको बताए । उद्योगका क्षेत्रमा आफूहरु संवेदनशील भएको बताउदै उनले शान्ति सुरक्षा,अमनचयन कायमसँगै व्यापार व्यवसायलाई पनि प्रवद्र्धन गर्नुपर्ने बताए ।
सबै कुरालाई मध्यनजर गरेर काम गर्ने बताउदै उनले पर्यटन व्यवसायलाई प्रवद्र्धन गर्ने सन्दर्भमा पनि छलफल गरेर अगाडी बढ्नुपर्ने बताए । कार्यक्रममा उद्योग वाणिज्य संघले प्रमुख जिल्ला अधिकारी हमाललाई रात्रिकालिन व्यवसायको समय बढाउन सहजिकरण गरिदिनु पर्ने लगायतका माग राखेका थिए ।
संघका अध्यक्ष पुष्पराज कुँवरको अध्यक्षतामा भएको कार्यक्रमको सञ्चालन संघका महासचिव ओमबहादुर बिष्टले गरेका थिए भने संघका वरिष्ठ उपाध्यक्ष पुष्कर ओझाले स्वागत मन्तव्य राखेका थिए ।
