पौष २१ धनगढी । कैलाली र कञ्चनपुरबाट भन्सार छली गरी ल्याएका अबैध सामान प्रहरीले नियन्त्रणमा लिएको छ ।
धनगढी उप महानगरपालिका वडा नम्बर २ धनगढीगाँउ, वडा नम्बर ९ त्रीवेणीघाट, जोशीपुर गाउँपालिका वडा नम्बर १ स्याउले, कैलारी गाउँपालिका वडा नम्बर ४ भितरीया मिलन सामुदायिक वन र “के” गाउँबाट अवैध रुपमा भारतबाट भन्सार छली गरिल्याएका करिब ३ लाख ८६ हजार ८ सय ८० रुपैया मूल्य बराबरको सामान प्रहरीले नियन्त्रणमा लिएको हो ।
जिल्ला प्रहरी कार्यालय कैलाली तथा मातहत कार्यालयबाट खटिएको प्रहरी गस्ती टोलीले चिनी, बिडी, सुर्ती, दुध पाउडर,फलामको साङ्लो, चप्पल, जुत्ता, मोजा, डोरी, भुजा, सिद्रा माछा लगायतका सामान बेबारिसे अवस्थामा फेला पारी नियन्त्रणमा लिएको हो ।
त्यसैगरी कञ्चनपुरको कृष्णपुर नगरपालिका वडा नम्बर ९ लालझाडी र बेलौरी नगरपालिका वडा नम्बर १० भुँडाबाट अवैध रुपमा भारतबाट भन्सार छली गरि ल्याएका अन्दाजी १ लाख ३८ हजार ३ सय ६५ रुपैया मूल्य बराबरको सामान प्रहरीले बरामद गरेको छ ।
जिल्ला प्रहरी कार्यालय कञ्चनपुर मातहत कार्यालयहरुबाट खटिएको प्रहरी गस्ती टोलीले बिडी, सुर्ती, प्लाष्टिक झिल्ली लगायतका सामान बेबारिसे अवस्थामा फेला पारी नियन्त्रणमा लिएको हो ।
त्यसैगरी बैतडी प्रहरीले अवैध सामान बरामद गरेको छ । शनिबार दशरथचन्द नगरपालिका वडा नम्बर – १० अदारीपिण्ड स्थित सडक किनारबाट अवैध रुपमा भारतबाट भन्सार छली गरी ल्याएका ६२ हजार ६ सय २५ रुपैयाँ बराबरको सामान बरामद गरिएको हो ।
चिनी, मिश्री, दाल, खाने तेल, सरप, नरिवल, जिरा, चियापत्ती, पिठो, सुर्ती, साबुन, बदाम, प्लाष्टिक झिल्ली लगायतका सामानहरु प्रहरी चौकी बाराकोटबाट खटिएको गस्ती टोलीले बेबारिसे अवस्थामा फेला पारी नियन्त्रणमा लिएको हो । बरामद सामान आवश्यक कार्बाहीका लागि भन्सार कार्यालय झुलाघाट पठाइएको बताईएको छ ।
