पौष १८ धनगढी । सुदूरपश्चिम प्रदेशको कैलाली र कञ्चनपुरमा निर्माण भइरहेको हुलाकी राजमार्ग निर्माणमा बजेट अभाव भएको छ । चालु आर्थिक वर्षमा हुलाकी राजमार्ग निर्माणका लागि सङ्घीय सरकारले दिएको बजेट मध्ये गत आर्थिक बर्षको दायित्व भुक्तानीमै सकिए पछि बजेट अभाव भएको हो ।

हुलाकी राजमार्गको आयोजना कार्यालय धनगढीका अनुसार चालु आथिक बषमा सरकारले ३२ करोड ५० लाख रुपियाँ बजेट पठाएकोमा २० करोड ६५ लाख गत आर्थिक बर्षको दायित्व भुक्तानीमै सकिएको बताईएको छ । बाँकी रकम निर्माण कम्पनीलाई साउन देखि असोज सम्मको काम गरेबापतको भुक्तानी गर्दा सकिएको जनाइएको छ ।

चालु आर्थिक बर्षका लागि सरकारले पठाएको बजेट सकिएकाले अहिले बजेटको अभाव भएको हुलाकी राजमार्ग आयोजनाको कार्यालय धनगढीका प्रमुख मुकुन्दप्रसाद लामिछानेले बताए । थप बजेट मागका लागि प्रक्रिया अगाडि बढाएको उनले बताए । चालु आर्थिक बर्षमा बजेट नरहे पनि निर्माण कम्पनीले काम भने नरोकेको उनले बताए ।

कैलालीको लम्की–टीकापुर खण्ड, भजनी–धनगढी लगायतमा काम भइरहेको उनले बताए । थप बजेट मागका लागि सडक विभागमा टिप्पणी फाइल पठाएको बताउदै प्रमुख लामिछानेले बजेट अभाव भए पनि अहिले सम्म काम नरोकिएको बताए । थप बजेट नआए काम पूरा गर्न समस्या हुने बताउदै उनले चालु आर्थिक वर्षको हाल सम्म निर्माण कम्पनीले २० करोड रुपैया बराबरको काम गरिसकेको बताए ।

रकम भुक्तानीका लागि आयोजना कार्यालयसँग बजेट नभएको उनले बताए । कैलालीमा विभिन्न खण्डमा विभाजन गरेर छुट्टाछुट्टै ठेक्का मार्फत हुलाकी राजमार्ग निर्माणको काम भइरहेको छ । कतिपय खण्डको काम पूरा भइसकेको छ भने कतिपय ठाउँको काम अन्तिमतिर पुगेको छ । धनगढी देखि भजनी सम्म हुलाकी राजमार्ग स्तरोन्नतिको काम चालु आर्थिक बर्षमा सक्ने आयोजना कार्यालयको लक्ष्य रहेको उनले बताए ।

यो खण्डमा हाल धनगढी उपमहानगरपालिका वडा नम्बर–१९ र कैलारी गाउँपालिका वडा नम्बर–४ क्षेत्रमा काम भइरहेको उनले बताए । बजेटका कारण समस्या नभएमा धनगढी देखि भजनी सम्मको स्तरोन्नतिको काम चालु आर्थिक बर्षभित्रै पूरा हुने प्रमुख लामिछानेले बताए । अरू क्षेत्रमा पनि प्रगति हुने बताउदै उनले प्रमुख काम सकिने बताए ।

केही ठाउँमा पुल निर्माण लगायतका काम बाँकी रहन सक्ने उनले बताए । हुलाकी राजमार्ग अन्तरर्गत कञ्चनपुरको दोदा नदीमा पुल निर्माण भइरहेको उनले बताए । त्यसैगरी धनगढी उपमहानगरपालिका धनगढी गाउँ र वडा नम्बर १ र २ जोड्ने खोलामा पुल बन्न बाँकी रहेको बताउदै उनले पुलको काम सम्पन्न हुन अझै समय लाग्ने बताए ।

कञ्चनपुरमा हुलाकी राजमार्ग निर्माणको काम चालु आर्थिक बर्षमै पूरा गर्ने लक्ष्य रहेको उनले बताए । जम्मा ४२ किलोमिटर बन्ने राजमार्गको चार÷पाँच किलोमिटरमा निर्माणको काम बाँकी रहेको उनले बताए । कञ्चनपुरमा सबै काम यसै आर्थिक बर्ष भित्र सक्ने लक्ष्य रहेको प्रमुख लामिछानेले जानकारी गराए ।