असार ०६ धनगढी । कैलालीका १३ वटा स्थानीय तहको बेरुजु तीन अर्ब ६९ करोड ९६ लाख १७ हजार पुगेको छ । स्थानीय तहमा ऐन, नियम विपरीत मनपरी तरिकाले बजेट खर्च गर्ने परिपाटीका कारण स्थानीय तहको बेरुजु घट्नुको सट्टा बर्षेनि बढ्दै गएको छ । महालेखा परीक्षकको कार्यालयले तयार पारेको आर्थिक वर्ष २०७९÷८० को अन्तिम लेखापरीक्षण प्रतिवेदन अनुसार प्रत्येक स्थानीय तहमा करोडौँ रुपियाँ नयाँ बेरुजु थपिएको छ ।

कैलालीमा सबैभन्दा बढी बेरुजु घोडाघोडी नगरपालिकाको देखिएको छ । उक्त पालिकाको कुल बेरुजु रकम ४९ करोड ५४ लाख ८३ हजार पुगेको प्रतिवेदनमा उल्लेख छ । आर्थिक वर्ष २०७९÷८० को लेखापरीक्षणबाट यो पालिकाको नयाँ बेरुजु दुई करोड ९८ लाख ९० हजार देखिएको छ । यसअघिको आर्थिक वर्षसम्म घोडाघोडीको बेरुजु ४६ करोड ५८ लाख ६२ हजार रहेको थियो । त्यसैगरी दोस्रोमा गोदावरी नगरपालिकाको रहेको छ ।

गोदावरी नगर पालिकाको बेरुजु ४९ करोड २९ लाख सात हजार रुपैयाँ पुगेको छ ।आर्थिक वर्ष २०७९÷८० लेखापरीक्षणबाट यस पालिकाको नयाँ बेरुजु पाँच करोड ४८ लाख ७७ हजार थप भएको छ । यस अघिसम्मको बेरुजु ४३ करोड ८६ लाख ३१ रुपैयाँ रहेको थियो । तेस्रोमा लम्कीचुहा नगरपालिका देखिएको छ । लम्की चुहाको ४७ करोड छ लाख ४१ हजार रुपैयाँ बेरुजु पुगेको महालेखा परीक्षकको अन्तिम लेखापरीक्षण प्रतिवेदनमा उल्लेख गरिएको छ ।

आर्थिक वर्ष २०७९÷८० को लेखापरीक्षणबाट लम्कीचुहाको नयाँ बेरुजु चार करोड १० हजार रुपैयाँ देखिएको छ । अघिल्लो आर्थिक वर्ष सम्म यस पालिकाको बेरुजु ४३ हजार सात लाख ६६ हजार रहेकोमा एक लाख ३५ हजार रुपैयाँ समपरीक्षण गरिएको थियो । त्यसैगरी धनगढी उप–महानगरपालिकाको कुल बेरुजु ३२ करोड ४८ लाख ७१ हजार पुगेको छ । आर्थिक वर्ष २०७९÷८० मा मात्रै धनगढीको बेरुजु चार करोड ५२ लाख ९३ हजार रुपैयाँ थपिएको छ ।

त्यस्तै, टीकापुर नगरपालिकाको दुई करोड ३७ लाख ७९ हजार नयाँ बेरुजु थप भई ३० करोड २३ लाख ८२ हजार, भजनी नगरपालिकाको चार करोड तीन लाख ८१ हजार थप भई ३२ करोड ६७ लाख ११ हजार रुपैयाँ पुगेको छ । गौरीगङगा नगरपालिकाको बेरुजु तीन करोड ७९ लाख ८० हजार थप भई ३० करोड २२ लाख ४७ हजार रुपैयाँ पुगेको छ । कैलालीमा सबैभन्दा कम १२ करोड ४४ हजार रुपैयाँ बेरुजु जोशीपुर गाउँपालिकाको रहेको छ ।

त्यसैगरी, कैलारी गाउँपालिकाको बेरुजु १४ करोड ६५ लाख, मोहन्याल गाउँपालिकाको बेरुजु २० करोड ८९ लाख ४४ हजार पुगेको छ । त्यस्तै, जानकी गाउँपालिकाको बेरुजु १९ करोड ४७ लाख ६६ हजार पुगेको प्रतिवेदनमा उल्लेख छ । चुरे गाउँपालिकाको बेरुजु १४ करोड १७ लाख ३९ हजार र बर्दगोरिया गाउँपालिकाको बेरुजु १७ करोड २३ लाख ८२ हजार रुपैयाँ पुगेको महालेखा परीक्षकको अन्तिम लेखापरीक्षण प्रतिवेदनमा उल्लेख गरिएको छ । धेरैजसो स्थानीय तहले पुरानो त्रुटिलाई नसच्याई दोहो¥याउँदै गइरहेको प्रतिवेदनमा उल्लेख गरिएको छ ।