जेठ ३० कञ्चनपुर । कञ्चनपुरको कृष्णपुर नगरपालिकाले आर्थिक सहायताका नाम्मा १३ लाख १० हजार २ सय ६५ रुपैया वितरण गरीएको पाइएको छ । नगरपालिकाले मापदण्ड र कार्यविधि तयार नगरेर १३ लाख १० हजार २ सय ६५ रुपैया आर्थिक सहायताका नाममा वितरण गरिएको पाईएको हो ।
महालेखा परिक्षकको प्रतिवेदनमा स्पष्ट मापदण्ड र कार्यविधि तर्जुमा गर्नुपर्ने तथा बजेट विनियोजन गर्नुपर्ने भए पनि नगरपालिकाले कार्यविधि तयार नगरी विभिन्न ८२ जना व्यक्तिलाई ३ हजार देखी १० हजार सम्म आर्थिक सहयोग प्रदान गरेको प्रतिवेदनले देखाएको छ । कर्मचारीलाई आर्थिक सहायताका नाम्मा ५० हजार रुपैया दिएको पनि महालेखा परिक्षकको प्रतिवेदनमा देखिएको छ ।
नगरपालिकामा कार्यालय सहयोगीका रुपमा कार्यरत कर्मचारीलाई दिईएको उक्त रकम नियम संगत नभएको महालेखा परिक्षकको प्रतिवेदनमा उल्लेख गरिएको छ । प्रतिवेदनमा मापदण्ड वेगर आर्थिक सहायता वितरण गर्ने प्रकृयामा नियन्त्रण गरिनु पर्ने उल्लेख गरिएको छ । पालिकाले आर्थिक वर्ष २०७९÷०८० मा भ्रमण खर्च वाफत २४ लाख ९८ हजार २ सय रुपैया खर्च गरेको देखिएको छ ।
महालेखा परिक्षकको कार्यालयको प्रतिवेदन अनुसार पालिकाले कर्मचारी तथा पदाधिकारीलाई भ्रमण खर्च र अनुगमन खर्च वाफत उक्त रकम खर्च गरेको हो । तर उक्त रकमको खर्चका विषयमा प्रतिवेदनमा केही व्यहोराहरु उल्लेख गरिएका छन । जसमा अधिकांश भ्रमणको उद्देश्य र प्रयोजन कार्यालयकै कामका लागि भएको भनि सुनिश्चित हुने विश्वसनिय आधार नदेखिएको, भ्रमण पश्चात तोकिएको ढाँचामा भ्रमण प्रतिवेदन पेश नगरी भ्रमणको खर्च भुक्तानी गरेको, भ्रमण अभिलेख अद्यावधिक नगरेको लगायत रहेका छन ।
प्रतिवेदनले तोकिएको कानुनी व्यवस्थाको पालना गर्दै भ्रमण खर्च गर्दा पालिकाको प्रयोजनमा खर्च भएको सुनिश्चितता हुने आधार हुनुपर्ने प्रतिवेदनमा उल्लेख गरिएको छ । त्यसैगरी नगरपालिकाले गत आर्थिक वर्ष २०७९÷०८० मा १ करोड ३१ लाख ८३ हजार ६ सय ५२ रुपैया ईन्धनमा खर्च गरेको देखिएको छ ।
कार्यालयले उक्त खर्च कार्यालय प्रयोजनार्थ कर्मचारी र पदाधिकारीका लागि गरेको बताएको महालेखा परिक्षकको कार्यालयको प्रतिवेदनमा उल्लेख गरिएको छ । कार्यालयले उक्त खर्च लेख्दा कुन गाडीको लागि कति इन्धन उपलब्ध गराई कहाँ कहाँ गई के मा सवारी साधन प्रयोग भएको हो भन्ने सम्पूर्ण विवरण उपलब्ध नभएकाले उक्त खर्च कार्यालय प्रयोजनकै लागि भएको एकिन गर्ने कुनै आधार नभएको प्रतिवेदनमा उल्लेख गरिएको छ ।
