बैशाख २४ धनगढी । धनगढी उप महानगरपालिकाले २३ करोड ४० लाख ९३ हजार राजस्व सङ्कलन गरेको छ । उप–महानगरपालिकाले चालु आर्थिक बर्ष २०८०÷८१ को साउन देखि चैत मसान्त सम्म २३ करोड ४० लाख ९३ हजार राजस्व सङ्कलन गरेकोे हो ।

सम्पत्ति करबाट दुई करोड ९१ लाख ५० हजार, भूमि करबाट ८२ लाख ८५ हजार, बहाल करबाट पाँच करोड ३७ लाख ८८ हजार, बहाल विरौटी करबाट ११ लाख ८७ हजार, सवारीसाधन करबाट चार लाख ३२ हजार र अन्य करबाट चार लाख ७८ हजार राजस्व सङ्कलन भएको उप–महानगरपालिकाका राजस्व शाखा प्रमुख लेखनाथ ओझाले जानकारी दिए ।

उनका अनुसार सरकारी सम्पत्ति बहालबाट प्राप्त आय ६८ लाख पाँच हजार, अन्य सेवा शुल्कबाट २४ लाख ७९ हजार, शिक्षा क्षेत्रको आम्दानी १३ लाख ४४ हजार, पार्किङ शुल्कबाट ५२ लाख ९७ हजार, नक्सा पास दस्तुरबाट दुई करोड २७ लाख ७७ हजार, सिफारिस दस्तुरबाट एक करोड ३२ लाख २७ हजार राजस्व सङ्कलन भएको छ ।

त्यस्तै व्यक्तिगत घटना दर्ता दस्तुरबाट १० लाख सात हजार, नाता प्रमाणित दस्तुरबाट तीन लाख ६१ हजार, अन्य दस्तुरबाट सात लाख ५६ हजार, प्रशासनिक दण्ड जरिवानाबाट ४४ लाख ११ हजार, व्यवसायबाट तीन करोड १७ लाख २६ हजार, अन्य राजस्व चार करोड ९९ लाख ५२ हजार, बेरुजुबापत पाँच लाख ८६ हजार, सामुदायिक वनबाट प्राप्त आय ३२ हजार र विज्ञापन करबाट पाँच हजार राजस्व सङ्कलन भएको उनले जानकारी दिए ।

करको दायरा बढ्दै जाँदा राजस्व सङ्कलनमा वृद्धि हुँदै गएको शाखा प्रमुख ओझाले बताए । प्रत्येक वर्ष करको दायरा बढ्दै जाने बताउदै उनले आगामी आर्थिक बर्षमा पनि करको दायरा बढ्ने बताए । तर करको दर भने यथावत रहने उनले बताए । गत आर्थिक बर्ष २०७९÷८० मा उप–महानगरपालिकाले कूल २७ करोड ९२ लाख १५ हजार राजस्व सङ्कलन गरेको उनले जानकारी गराए ।