चैत्र २७ धनगढी । सुदूरपश्चिम प्रदेशमा ९ महिनाको अवधीमा आर्थिक अनियमितताका ७ सय बढी उजुरी परेका छन् । अख्तियार दुरुपयोग अनुसन्धान आयोगको महेन्द्रनगरस्थित कार्यालय कञ्चनपुरमा साउन देखी चैत २७ गते सम्म ७ सय ३९ उजुरी परेका हुन् । सार्वजनिक निर्माण तथा संघ, प्रदेश र स्थानीय तहमा बसेर पदीय दुरुपयोग गरी कैफियत गर्ने कर्मचारी र पदाधिकारी विरुद्ध धमाधम उजुरी परेको अख्तियारले जनाएको छ । सार्वजनिक पद धारण गरेका ब्यक्ती, कर्मचारी एवं पदाधिकारीले आर्थिक अनियमितता गरेको भन्दै दैनिक रुपमा मुद्दा दर्ता हुने गरेको अख्तीयारले जनाएको छ । मुद्दा दर्ता गर्न पिडीतले अख्तियार दुरुपयोग अनुसन्धान आयोगको महेन्द्रनगरस्थित कार्यालयमा इमेल,टेलिफोन,लिखित निवेदन,हुलाक सेवा,फेसबुक,समाचार पत्र,प्रमुख जिल्ला अधिकारीबाटै तथा अन्य स्रोतको प्रयोग गरेर उजुरी मुद्दा दर्ता गराउने गरेको अख्तीयारले जनाएको छ ।

चालु आर्थिक वर्षको साउन महिनामा सबैभन्दा बढी १ सय ७३ उजुरी परेको बताईएको छ । कर्मचारी, जनप्रतिनिधि र विभिन्न संघसंस्थाको नाममा उक्त संख्यामा उजुरी अख्तियारमा दर्ता भएको अख्तीयारले जनाएको छ । इमेलबाट ४१, टेलिफोन १६, लिखित निवेदन ४० र हुलाकी सेवाबाट ६४, फेसबुक,समाचार पत्र तथा प्रमुख जिल्ला अधिकारीबाट ३÷३ उजुरी दर्ता भएको अख्तियार दुरुपयोग अनुसन्धान आयोगको कार्यालय कञ्चनपुरको अभिलेखले देखाएको छ । त्यसैगरी भदौ महिनामा हुलाकी सेवाबाट १२, लिखित निवेदन ५१, टेलिफोन र इमेलबाट १०÷१० र अन्य स्रोतबाट गरी जम्मा ८५ उजुरी दर्ता भएको दखिएको छ । असोजमा ८२ उजुरी परेको मध्ये हुलाक सेवाबाट १८, लिखित निवेदन ४१, टेलिफोन १० इमेलबाट ११ उजुरी दर्ता भएको अभिलेख रहेको छ ।

त्यसैगरी कार्तिक महिनामा ४१ उजुरी दर्ता भएकोमा हुलाक सेवाबाट १५, लिखित निवेदन १७, टेलिफोन ३, इमेलबाट ५ उजुरी परेका छन् । मंसिरमा ९० उजुरी अख्तियार दुरुपयोग अनुसन्धान आयोगको कार्यालय कञ्चनपुरमा दर्ता भएको तथ्याङकले देखाएको छ । जसमा हुलाक सेवाबाट १५, लिखित निवेदन ४०, इमेलबाट १९, टेलिफोनबाट १५, वेवसाईडबाट १ उजुरी दर्ता भएका थिए । पौष महिनामा ५१ उजुरी दर्ता भएकोमा हुलाक सेवाबाट १४, लिखित निवेदन १२ , इमेलबाट १६ , टेलिफोनबाट ७ , वेवसाईडबाट १ उजुरी दर्ता भएका थिए । त्यसैगरी माघ महिनामा ७१ वटा उजुरी दर्ता भएका थिए ।

हुलाक सेवाबाट १४,समाचार पत्रबाट २, लिखित निवेदन २९, इमेलबाट १२,टेलिफोनबाट ११, वेवसाईडबाट २ र अन्य स्रोतबाट १ उजुरी दर्ता भएका थिए । त्यसैगरीै फागुनमा पनि ७१ वटा उजुरी दर्ता भएका छन् । हुलाक मार्फत १५, लिखित निवेदन १४,टेलिफोनबाट ११, इमेलबाट ३० र अन्य स्रोत बाट १ उजुरी दर्ता भएको अख्तियार दुरुपयोग अनुसन्धान आयोगको कार्यालय कञ्चनपुरको अभिलेखमा उल्लेख गरिएको छ । त्यसैगरी चालु आर्थिक बर्षको चैत २७ गत ेसम्म ७५ वटा उजुरी दर्ता भएका छन् । हुलाक मार्फत २०, लिखित निवेदन ३०, टेलिफोनबाट १२, इमेलबाट १३ उजुरी दर्ता भएको अख्तियार दुरुपयोग अनुसन्धान आयोगको महेन्द्रनगरले जनाएको छ ।

चालु आर्थिक वर्षको साउन देखि हाल सम्म ७ सय ३९ वटा मुद्दा दर्ता भएका छन् । सार्वजनिक पदधारण गरेका व्यक्तिबाटै अनियमितता हुने गरेपछि सम्वन्धित स्थानीयले उनीहरु विरुद्ध कारबाहीको माग गर्दै दैनिक रुपमा उजुरी दिन थालिएको अख्तीयारले जनाएको छ । सार्वजनिक निर्माण, निर्माणमा अनियमितता, पदीय दुरुपयोग गरेर काम कारबाही गरेको लगायत विषयमा अख्तियारमा उजुरी पर्ने गरेको बताइएको छ । अख्तियारमा परेका उजुरीमाथि कारबाही प्रक्रिया समेत अघि बढाइएको अख्तियारले जनाएको छ ।