चैत्र १५ बैतडी । बैतडीमा नेपाल विद्युत प्राधिकरणले समयमै विद्युत महसुल नबुझाउने ग्राहकहरुको लाइन काट्न शुरु गरेको छ । चालु आर्थिक बर्षमा विद्युत महसुल बाफतको बक्यौता रकम असुल गर्ने उद्देश्य सहित समयमै महसुल नबुझाउने ग्राहकको लाइन काट्न थालिएको नेपाल विद्युत प्राधिकरण बैतडी वितरण केन्द्रका प्रमुख जनार्दन पौडेलले बताए । बैतडीमा १ हजार रुपैयाँ भन्दा बढी महसुल भएका १ हजार १३ ग्राहकले समयमा विद्युत महसुल नबुझाएको उनले जानकारी गराए ।
त्यसमध्ये १ सय २२ वटा सरकारी कार्यालय र ८ सय ९२ वटा अन्य ग्राहक रहेको वितरण केन्द्र प्रमुख पौडेलले बताए । सरकारी कार्यालयबाट १७ लाख ५१ हजार ९ सय १९ रुपैयाँ महसुल असुल गर्न बाँकी रहेको बताउदै उनले अन्य ग्राहकबाट ६५ लाख ९९ हजार ३ सय २२ रुपैयाँ महसुल बाफतको रकम असुल गर्न बाँकी रहेको बताए । बैतडीमा १ हजार रुपैयाँ भन्दा बढी महसुल भएका ग्राहकहरुबाट ८३ लाख ५१ हजार २ सय ४२ रुपैयाँ असुल गर्न बाँकी रहेको वितरण केन्द्र प्रमुख पौडेलले बताए ।
जिल्लाभरी झण्डै १ करोड रुपैयाँ महसुल उठाउन बाँकी रहेको बताउदै उनले एक हजार रुपैयाँ भन्दा मुनिका ग्राहकहरुले समेत समयमा विद्युत महसुल नबुझाएको जानकारी गराए । अहिले तीन महिना भन्दा बढी भइसक्दा समेत विद्युत महसुल नबुझाएका ग्राहकहरुको लाइन काट्ने काम भइरहेको उनले बताए । मंगलबार मात्रै एकैदिन २८ जना ग्राहकको लाइन काटिएको बताउदै उनले विद्युत महसुल तिरेपछि मात्रै लाइन काटिएका ग्राहकको लाइन जोडिने बताए ।
यसअघि गएको साउन देखि महसुल असुल गर्ने अभियान अन्तर्गत नेपाल विद्युत प्राधिकरणले समयमा महसुल नबुझाउने ग्राहकहरुको लाइन काट्न शुरु गरेको उनले बताए । साउन देखि अहिले सम्म ५ सय ५० ग्राहकको लाइन काटिएको र ती मध्ये ५७ वटा सरकारी कार्यालय रहेको उनले जानकारी गराए । लाइन काटिएका मध्ये ३६ वटा सरकारी कार्यालयहरुले महसुल बुझाएर लाइन फेरि जडान गरेको बताउदै उनले १ सय ८९ वटा अन्य ग्राहकहरुले महसुल बुझाएर लाइन जडान गरेको जानकारी गराए ।
उनीहरुबाट २७ लाख ४७ हजार ८ सय २१ रुपैयाँ बक्यौता रकम असुल गरिएको उनले जानकारी गराए । मिटर रिडिङ भएको ६० दिनभित्र विद्युत महसुल नबुझाउने ग्राहकको लाइन काट्ने प्रावधान रही आएको बताउदै प्रमुख पौडेलले समयमै विद्युत महसुल बुझाउन आग्रह गरेका छन् । बैतडीमा २३ हजार बढी विद्युतका ग्राहक रहेको उनले जानकारी गराएका छन् ।
