माघ १३ डोटी,
डोटीमा औद्योगिक ग्राम निर्माण योजना अलपत्र परेको छ । मन्त्रीस्तरीय निर्णयबाट दुई वर्षअघि डोटीमा औद्योगिक ग्राम निर्माण गर्ने निर्णय भए पनि अहिलेसम्म बजेट अभाव हुँदा अलपत्र परेको हो ।
२०७६ माघ २० गते नेपाल सरकार मन्त्रिपरिषद्को निर्णयले निर्णयले देशभर घोषणा भएका ४५ वटा औद्योगिक ग्राम मध्येको डोटीको जोरायल गाउँपालिका वडा नम्बर–२ बुडरस्थित धारापानीमा निर्माण हुन लागेको औद्योगिक ग्राम बजेट अभावले अलपत्र परेको हो । ग्राम निर्माणका लागि संघीय सरकारबाट आर्थिक वर्ष २०७६÷७७ मा ९२ लाख निकासा आएकोमा ८३ लाख ६० हजार मात्र खर्च भएको जोरायल गाउँपालिकाले जनाएको छ ।

उक्त रकमबाट औद्योगिक ग्राम क्षेत्रमा सडक, खानेपानी, शौचालय र प्रशासनिक भवन, घेरबार लगायतका संरचना निर्माण सुरु भए पनि बजेट अपुग भए पछि काम रोकिएको जोरायल गाउँपालिका अध्यक्ष दुर्गादत्त ओझाले बताउनु भयो । उनले विभागसँग नियमित छलफल भएको बताउदै विस्तृत अध्ययन गरेर चाँडै बजेट निकासा गरिने विश्वास रहेको बताउनु भयो  ।’ औद्योगिक ग्राम निर्माणका लागि भौतिक संरचना निर्माण कार्य सुरुमा तीव्र रूपमा भए पनि अहिले सुस्ताएको बताईएको छ । कुल ५० रोपनी जग्गामा औद्योगिक ग्राम निर्माण कार्य भइरहेको बताउदै अध्यक्ष ओझाले कम्तीमा पनि ५ सय रोपनी सम्म जग्गा आवश्यक पर्ने बताएका छन् । सामुदायिक वन क्षेत्रमा औद्योगिक ग्राम निर्माण भएकाले थप जमिन प्राप्तिका लागि विभिन्न कानुनी अड्चन आउन सक्ने अनुमान गरिएको छ । औद्योगिक पूर्वाधार तथा वातावरण महाशाखाले आर्थिक वर्ष ०७७÷०७८ मा १ सय ३० वटा स्थानीय तहमा औद्योगिक ग्रामका लागि प्रस्ताव गर्न पत्राचार गरे पनि डोटीका कुनै पनि तहले घोषणा गरेका छैनन् ।