बैशाख २४ बाजुरा । बाजुराको गौमुल गाउँपालिका वडा नम्बर–४ कालादह स्थित कीर्तिचौर माध्यमिक विद्यालयले अंग्रेजी माध्यमबाट पठनपाठन सुरु गरेको छ । विद्यालयले चालु नयाँ शैक्षिक सत्रबाट अंग्रेजी माध्यमबाट पठनपाठन सुरु गरेकोे हो ।
गौमुल गाउपालीका वडा नम्बर–४ का वडा अध्यक्ष एवम् विद्यालय व्यवस्थापन समिति अध्यक्ष अमर विकले समयको माग र अभिभावकहरुको चाहना अनुसार विद्यालयमा अंग्रेजी माध्यमबाट पठनपाठन सुरु गरिएको जानकारी गराए ।
यस बर्षबाट इसीडी र १ बी कक्षामा अंग्रेजी माध्यमबाट पढाई सुरु गरेको जानकारी गराउदै उनले आगामी बर्षबाट कार्यविधि बमोजिम कक्षा ३ सम्म अनिवार्य अंग्रेजी माध्यमबाट पठन पाठन सञ्चालन गरिने बताए ।
विद्यालयले अंग्रेजी माध्यमका विद्यार्थीबाट कक्षा अनुसारको न्यूनतम शुल्क लिने व्यवस्था समेत गरेको उनले जानकारी गराए । अंग्रेजी माध्यमबाट पढाइ हुन थालेपछि अभिभावकहरु समेत खुसी भएको उनले बताए ।
पछिल्लो समय सामुदायिक विद्यालयमा विद्यार्थीहरु घट्दै गएको अवस्थामा कीर्तिचौर माध्याम्कि विद्यालयले भने शैक्षिक गुणस्तर सुधारका लागि विभिन्न रणनीतिक योजना बनाउँदै शिक्षण सिकाई सञ्चालन गरिरहेको उनले बताए ।
कीर्तिचौर माध्याम्कि विद्यालयले ले कक्षा ९ देखि १२ सम्म प्राविधिक धारका कक्षाहरु समेत सञ्चालन गर्दै आएको बताउदै उनले हाल विद्यालयहरूमा पुस्तकालय, कम्प्युटर ल्याब र स्मार्ट बोर्डमार्फत पढाउने व्यवस्था मिलाइएको बताए ।
पछिल्लो समय सामुदायिक विद्यालय प्रति अभिभावकको आकर्षण घट्दै गएको अवस्थामा विद्यालयले अंग्रेजी माध्यम लागु गर्नु केवल भाषाको परिवर्तन नभई शैक्षिक प्रतिस्पर्धामा टिक्ने प्रयासका रूपमा हेरिएको उनले बताए ।
विशेषगरी ग्रामीण क्षेत्रका सामुदायिक विद्यालयमा विद्यार्थी संख्या घट्दै जानु, निजी विद्यालय प्रतिको आकर्षण बढ्नु र शैक्षिक गुणस्तरमाथि प्रश्न उठिरहेका बेला कीर्तिचौरले नयाँ अभ्यासको सुरुवात गरेको उनले बताए ।
