बैशाख २५ धनगढी । तत्कालीन नेकपा (माओवादी केन्द्र) बाट राष्ट्रिय सभा सदस्य बनेका जगतबहादुर पार्की विरुद्ध बैंकिङ्ग कसुर मुद्दामा पक्राउ पुर्जी जारी गरिएको छ । डडेल्धुराको आलिताल गाउँपालिका वडा नम्बर–७ स्थायी घर भएका पार्की विरुद्ध धनगढी उपमहागरपालीका वडा नम्बर–३ का नरेशबहादुर थापाले गत चैत २ गते मुद्दा दायर गरेकोमा अदालतले चैत्र १७ गते नै पक्राउ पुर्जी जारी गरेको हो ।
मुद्दा नम्बर ०८२–सि १–०७६९ रहेको उक्त मुद्धामा कैलाली जिल्ला अदालतले उनीविरुद्ध वारेन्ट जारी गरे पनि चार महिना देखि पार्की प्रहरीको सम्पर्क बाहिर रहेका छन् । जिल्ला प्रहरी कार्यालय कैलालीका सूचना अधिकारी प्रहरी नायव उपरीक्षक (डीएसपी) योगेन्द्र तिमिल्सिनाले पार्कीविरुद्ध पक्राउ पुर्जी जारी भएकोबताउदै मुद्दा अदालतमा बुझाइ सकिएको जानकारी गराएका छन ।
पुर्जी जारी भए पनि उनलाई अहिलेसम्म पक्राउ गर्न नसकिएको प्रहरी नायव उपरिक्षक तिमिल्सिनाले जानकारी गराए । पार्कीविरुद्ध कैलालीमा मात्र नभई काठमाडौंमा समेत पक्राउ पुर्जी जारी भएको बुझिएको छ । वैदेशिक रोजगारीको प्रलोभन देखाएर ठगी गरेको आरोपमा उनीमाथि अनुसन्धान भइरहेको छ ।
केही दिनअघि प्रहरी वृत्त बानेश्वरको टोली उनलाई पक्राउ गर्न बानेश्वरस्थित निवासमै पुगेको भए पनि पार्की घरमा फेला नपरेपछि रित्तै फर्किएको थियो । प्रहरीका अनुसार मुद्दा बैंकिङ्ग कसुरसँग सम्बन्धित भएकाले पीडितको रकम फिर्ता गरेको खण्डमा मिला पत्र हुने सम्भावना रहेको छ ।
