बैशाख २४ धनगढी । कैलालीको गोदावरी नगरपालिकाले वर्षायाममा आउन सक्ने विपद् सामना गर्ने तयारीका लागि नगरपालिका प्रांगणमै विपद् कृत्रिम घटना अभ्यास आयोजना गर्ने भएको छ । शुक्रबार नगरपालीकाले स्थानियबासीलाई विपद् व्यवस्थापनका उपाय र तयारीबारे जानकारी दिने उद्देश्यले विपद् कृत्रिम घटना अभ्यास आयोजना गर्ने भएको हो ।
नगरपालिकाले यसअघि बिहिबार तयारी कार्यशाला आयोजना गरी विभिन्न सरोकारवालासँग छलफल गरेको थियो । कार्यक्रममा युएस वुमन, युएनडिपि, ह्यान्डिक्याप ईन्टरनेशनल, युनिसेफ लगायतका सुपर दोस्रो परियोजनाका साझेदारहरुले सहयोग गरेका थिए ।
कार्यशालामा विपद् व्यवस्थापनका सातवटा विषयगत क्षेत्रका प्रतिकार्य प्रणाली, समन्वय संयन्त्र र आपतकालीन सेवा प्रवाहबारे जानकारी दिइएको थियो । नगरपालिकाका अनुसार शुक्रबारको अभ्यासमा नगरभित्र रहेका विभिन्न सामुदायिक संस्था र विद्यालयका करिब १ सय ५० विद्यार्थी तथा अन्य सरोकारवाला निकायका पदाधिकारीहरुको सहभागिता रहने छ ।
नगरपालिकाकी विपद् व्यवस्थापन शाखा प्रमुख सुलोचना खड्काले अभ्यासमा विपद् आउनु अघि अपनाउन सकिने तयारी र विपद् पश्चात गरिने क्रियाकलापबारे जानकारी दिइने बताईन । कृत्रिम अभ्यासले मानविय जोखिम कम गर्ने, जोखिममा रहेका व्यक्तिहरुको सुरक्षा सुनिश्चित गर्ने, र व्यवस्थित व्यवस्थापन गर्ने नमुना प्रस्तुत गर्ने उनले बताईन ।
