बैशाख १८ कञ्चनपुर । कञ्चनपुरमा प्रथम सुदूरपश्चिम प्रदेश स्तरीय बाह्रसिङ्गा ब्याडमिन्टन प्रतियोगिता सुरु भएको छ । पश्चिमपाटी मिडियाले आयोजना गरेको प्रतियोगिता शुक्रबार देखि सुरु भएको हो । कञ्चनपुर जिल्ला अदालतका मुख्य न्यायाधीश राजेन्द्र भण्डारीले प्रतियोगिताको उद्घाटन गरेका हुन ।
प्रतियोगितामा ‘बी’ लेभलका ४८ तथा भेट्रानतर्फ ३२ टोलीको सहभागिता रहेको प्रतियोगिता संयोजक शेरबहादुर सिंहले जानकारी गराए । खेलकुदको माध्यमबाट बाह्रसिङ्गाको प्रमुख वासस्थान रहेको शुक्लाफाँटा राष्ट्रिय निकुञ्जको प्रवर्धन गर्न प्रदेश स्तरीय ब्याडमिन्टन प्रतियोगिता आयोजना गरिएको उनले बताए ।
प्रतियोगितामा ‘बी’ लेभलतर्फ पहिलो हुनेले ४४ हजार ४ सय ४४, दोस्रो हुनेले २२ हजार २ सय २२ र तेस्रो हुनेले ११ हजार १ सय ११ नगद सहित मेडल र प्रमाणपत्र प्राप्त गर्ने उनले बताए । त्यसैगरी भेट्रानतर्फ पहिलो हुनेलाई १५ हजार ५ सय ५५, दोस्रो हुनेलाई ७ हजार ५ सय ५५ र तेस्रो हुनेलाई ५ हजार ५ सय ५५ नगद सहित मेडल र प्रमाणपत्र प्रदान गरिने उनले बताए ।
उद्घाटन समारोहमा कञ्चनपुर खेलकुद विकास समितिका अध्यक्ष ज्ञानेन्द्रबहादुर सिंह, भीमदत्त नगरपालिकाका प्रमुख कार्यकारी अधिकृत महेश बम, कञ्चनपुर ब्याडमिन्टन सङ्घका अध्यक्ष राहुल भट्ट लगायतको उपस्थिति रहेको थियो ।
