बैशाख १८ डडेल्धुरा । डडेल्धुराको गन्यापधुरा गाउँपालिका वडा नम्बर–२ देवखेतमा निर्माण गरिएको १० शय्याको आधारभूत अस्पताल औपचारिक रूपमा सञ्चालनमा आएको छ । गाउँपालिका अध्यक्ष इन्द्रबहादुर कार्कीले अस्पताल भवनको उद्घाटन गरे पछिअस्पताल औपचारिक रूपमा सञ्चालनमा आएको हो ।
उद्घाटनसँगै एक जना एमबीबीएस चिकित्सकको व्यवस्थापनमा स्वास्थ्य सेवा प्रारम्भ गरिएको गाउँपालिका उपाध्यक्ष ज्ञानु सेटी देउवाले जानकारी गराईन । संघीय सरकार र गन्यापधुरा गाउँपालिकाको संयुक्त लगानीमा करिब १३ करोड रुपैयाँको लागतमा अस्पताल भवन निर्माण सम्पन्न भएको हो ।
अस्पताल सञ्चालनमा आएपछि स्थानीयवासीले सामान्य देखि आधारभूत उपचार सेवाका लागि टाढा जानुपर्ने बाध्यता हट्ने अपेक्षा गरिएको छ । विशेषगरी आकस्मिक सेवा, सामान्य रोगको उपचार, मातृ तथा शिशु स्वास्थ्य सेवा लगायतका सुविधा गाउँमै उपलब्ध हुने जनाइएको छ ।
स्थानीय तहमा स्वास्थ्य पूर्वाधार विस्तार भए पछि ग्रामीण क्षेत्रका नागरिकलाई समयमै उपचार पाउने अवसर बढ्ने विश्वास गरिएको छ । गाउँपालिकाले अस्पताललाई आवश्यक जनशक्ति र उपकरण थप गर्दै सेवा विस्तार गर्ने योजना रहेको जनाएको छ ।
