बेशाख १६ बाजुरा । हावाहुरी सहित वर्षा–पहिरो र चट्याङका कारण १६ वटा भेडाबाख्राको मृत्यु भएको छ भने ३८ वटा भेडाबाख्रा बेपत्ता भएका छन । बाजुराको जगन्नाथ गाउँपालिका वडा नम्बर–२ माथिल्लो हुनीस्थित वनमा चराउन लगेका चौपाया घर फर्काउने क्रममा मङ्गलबार साँझ परेको वर्षासँगै आएको पहिरो र चट्याङबाट १६ वटा भेडाबाख्राको मृत्यु भएको हो भने ३८ वटा बेपत्ता भएका हुन ।
जिल्ला प्रहरी कार्यालय बाजुराका प्रहरी निरीक्षक तथा प्रवक्ता नरेशबहादुर शाहीले १६ वटा भेडाबाख्राको मृत्यु हुनुका साथै ३८ वटा बेपत्ता भएको जानकारी गराएका हुन । सोही गाउँपालिका वडा नम्बर–२ का स्थानीय चैनबहादुर विष्टका दुईवटा भेडाको मृत्यु, नौवटा बेपत्ता, अमृत ल्वारका तीन वटा भेडाको पहिरोमा परी मृत्यु, १४ वटा बेपत्ता भएको प्रहरी प्रवक्ता शाहीले बताए ।
भीषण वर्षापछि आएको पहिरोमा पुरिएर सोही वडाका स्थानीय किसानका पाँच वटा भेडाको मृत्यु, १० वटा बेपत्ता र ऐन बहादुर विष्टका तीन वटा भेडाको मृत्यु, पाँचवटा बाख्रा बेपत्ता भएको उनले जानकारी गराए ।
त्यसैगरी, त्रिवेणी नगरपालिका वडा नम्बर–९ पैमाको खोया लेकमा स्थानीय कुलबहादुर साउदको गोठमा चट्याङ लागेर तीन वटा भेडाबाख्रा मरेको जानकारी गराउदै उनले मङ्गलबार बेलुकी आएको हुरीबतास सहित असिनापानी र चट्याङका कारण ठूलो क्षति भएको जानकारी गराए ।
त्यसैगरी मङ्गलबार आएको हुरीका कारण खप्तड छेडेदह गाउँपालिका वडा नम्बर–१ काँडाको काँट्यामा स्थानीय वीरे रावलले सञ्चालन गरेको पसल उडाएर क्षति भएको छ । स्थानीय व्यापारी रावलको काठ र जस्तापाताले बनाएको भुइँतले पसल हुरीले उडाएर लत्ताकपडा सहित सिलाउने मेसिनमा क्षति पुगेको प्रहरीले जनाएको छ ।
हुरीबतास सहित वर्षाले क्षति पुर्याएको प्रहरी चौकी कुन्ना, प्रहरी चौकी बडीमालिका र प्रहरी चौकी काँडाबाट प्रहरी टोली खटिइ क्षतिको विवरण सङ्कलन भइरहेको प्रहरी प्रवक्ता शाहीले जानकारी गराए । त्यसैगरी हुरीबतास सहित असिनापानीका कारण पाकेको गहुँ बालीमा पनि क्षति पुगेको कृषि ज्ञान केन्द्र बाजुराले जनाएको छ ।
