बैशाख १६ धनगढी । सुदूरपश्चिम विश्वविद्यालयको ३ सय बिघा जग्गा अतिक्रमण भएको छ । विश्वविद्यालयको आङ्गिक क्याम्पस टीकापुर बहुमुखी क्याम्पसको ३ सय ८० बिघा जग्गा मध्ये ३ सय बिघा जग्गा वर्षौंदेखि अतिक्रमण भएको हो । सुदूरपश्चिम विश्वविद्यालयका रजिष्ट्रार विनोद लेखकले ३ सय बिघा जग्गा वर्षौंदेखि अतिक्रमण भएको जानकारी गराए ।
विसं २०६२ सालमा तत्कालीन टीकापुर विकास समितिले क्याम्पसको स्थापनाका लागि ३ सय ८० बिघा जग्गा क्याम्पसलाई दिएको भए पनि क्याम्पसले ८० बिघा मात्रै भोगचलन गर्न पाएको उनले बताए । क्याम्पसको जग्गा मुक्तकमैया तथा सुकुमबासीका नाममा अतिक्रमण भएको उनले बताए । टीकापुरमा पर्याप्त जग्गा भएका कारण विश्वविद्यालयले कृषि कार्यक्रम सञ्चालन गरेको भए पनि जग्गा अतिक्रमण हुँदा कृषि सङ्कायको प्रयोगात्मकका लागि समस्या हुँदै आएको उनले बताए ।
हाल कृषि सङ्कायले ४० बिघा जग्गा मात्रै उपयोग गर्न पाएको उनले बताए । कृषि सङ्कायको प्रयोगात्मकका लागि कृषि फार्म, माछापोखरी लगायत काम हुन नसक्दा कृषि सङ्कायमा अध्ययनरत विद्यार्थीहरूलाई प्रयोगात्मक गर्न समस्या भएको विश्वविद्यालयले जनाएको छ । “अतिक्रमित जग्गा फिर्ता ल्याउनका लागि विश्वविद्यालयले पटक पटक आग्रह गरे पनि अतिक्रमण हट्न सकेको छैन ।
विश्वविद्यालयका रजिष्ट्रार लेखकले अहिलेको सरकारले अतिक्रमित जग्गा फिर्ता ल्याउँछ भन्नेमा आशावादी भएको बताए । यसका लागि विश्वविद्यालयले पहल गरिरहेको बताउदै उनले यसअघि अतिक्रमित जग्गामा बसेकाहरूलाई विभिन्न राजनीतिक पार्टीको संरक्षण भएका कारण अतिक्रमण हटाउन समस्या भएको बताए । विश्वविद्यालयले अतिक्रमित जग्गाको छानबिन गरी फिर्ता ल्याउन प्रयास गरे पनि सार्थकता पाउन नसकेको उनले बताए ।
