बैशाख १६ धनगढी । कैलालीको अत्तरियामा लैंगिक समानता, अपांगता तथा सामाजिक समावेशीकरण उत्तरदायी कृत्रिम घटना अभ्यास कार्यक्रम सम्पन्न भएको छ । गोदावरी नगरपालिका र रोयम–नेपालको संयुक्त आयोजनामा मंगलबार कार्यक्रम सम्पन्न भएको हो ।
गोदावरी नगरपालिकाकी उपप्रमुख शारदा देवी रोकायाको अध्यक्षतामा सम्पन्न कार्यक्रममा प्रमुख प्रशासकीय अधिकृत, विभिन्न वडाका अध्यक्ष, विषयगत शाखाका प्रमुख तथा विपद् सम्पर्क व्यक्तिहरूको सहभागिता रहेको थियो ।
कार्यक्रममा स्थानीय तथा वडास्तरीय विपद् व्यवस्थापन समितिका सदस्य, अपांगता भएका व्यक्तिको अधिकारका क्षेत्रमा कार्यरत संघसंस्थाका प्रतिनिधि तथा पछाडि पारिएका समुदायका प्रतिनिधिहरूबीच विपद्का समयमा सम्बोधन गर्नुपर्ने विविध आवश्यकताबारे छलफल गरिएको थियो ।
साथै आगामी तीन वर्षका लागि विपद् व्यवस्थापन सम्बन्धी कार्ययोजना निर्माण समेत गरिएको आयोजकले जनाएको छ । रोयम–नेपालकी विपद् विज्ञ विकला बाग्लेले स्थानीय तहका विपद् जोखिम न्यूनीकरण सम्बन्धी योजना, नीति तथा कार्यक्रममा लैंगिक समानता, अपांगता तथा सामाजिक समावेशीकरणका विषयलाई मुख्य प्रवाहमा ल्याउने उद्देश्यले कार्यक्रम आयोजना गरिएको बताइन् ।
उनले विपद् व्यवस्थापन प्रक्रियामा तथ्यांक व्यवस्थापनको अभावका कारण चुनौती थपिएको बताउदै त्यसतर्फ गम्भीर ध्यान दिन आवश्यक रहेको बताइन् । कार्यक्रम्मा युएस वुमन, युएनडिपि, ह्यान्डिक्याप इन्टरनेशनल र युनिसेफ लगायत सुपर दोस्रो परियोजनाका साझेदार संस्थाहरूको सहयोग रहेको उनले जानकारी गराईन ।
कार्यक्रमकी अध्यक्ष उपप्रमुख रोकायाले विपद् व्यवस्थापन प्रक्रियामा महिला, बालबालिका, अपांगता भएका व्यक्ति तथा पछाडि पारिएका समुदायको सहभागिता सुनिश्चित गर्नुपर्नेमा जोड दिइन् । विपद् व्यवस्थापनबाट “कसैलाई पनि बाहिर राख्न नहुने बताउदै उनले सबैको आवश्यकता अनुसार योजना बनाइनुपर्ने बताईन ।
