बैशाख ०४ धनगढी । कैलालीको धनगढी उपमहानगरपालिका वडा नम्बर–१ लक्ष्मीनगरका ५६ वर्षीय पतिराम चौधरीको कुटपिटबाट मृत्यु भएको परिवारले आरोप लगाएका छन् । छिमेकी महेश श्रेष्ठले कुकुर मरेको विषयलाई लिएर रिस राखी चौधरीलाई कुटपिट गर्दा कुटपिटबाट मृत्यु भएको परिवारले आरोप लगाएका हुन ।
चौधरीको घरको कुकुरले श्रेष्ठको कुकुरलाई टोकेर मारे पछि विवाद उत्पन्न भएको र श्रेष्ठले राति सुतिरहेका चौधरीलाई मरेको कुकुर देखाउने बहानामा आफ्नो घरमा बोलाएको परिवारका सदस्यले बताएका छन । लामो समयसम्म चौधरी घर नफर्किए पछि आफन्तहरू खोज्दै जाँदा चौधरी श्रेष्ठकै घरमा बेहोस अवस्थामा भेटिएको परिवारका सदस्यले बताएका छन ।
मृतककी श्रीमती रूपा चौधरीले आफ्ना पति सिँढीको तल ढलेको अवस्थामा भेटिएको र शरीरमा चोटपटक तथा निलडाम देखिएको बताउँदै कुटपिट गरेर हत्या गरिएको हुन सक्ने बताईन । आफू र छोरा घटनास्थल पुग्दा महेश श्रेष्ठ र उनकी आमाले चौधरीको शरीरमा पानी र बरफ हालिरहेको उनलृ बताईन । श्रेष्ठ परिवारले भने चौधरी सिँढीबाट लडेर बेहोस भएको दाबी गरेको छ ।
महेश श्रेष्ठकी आमा सुमित्रा श्रेष्ठले कुटपिट नभएको बताउँदै छतमा मरेको कुकुर हेरेर तल झर्दै गर्दा चौधरी लडेको र होसमा ल्याउन पानी तथा बरफ प्रयोग गरिएको बताईन । बेहोस अवस्थामा भेटिएका चौधरीलाई उपचारका लागि अस्पताल लगिएको भिए पनि चिकित्सकले परीक्षण पछि मृत घोषणा गरेको उनले बताईन ।
घटनाको अनुसन्धानका लागि जिल्ला प्रहरी कार्यालयले एक जनालाई नियन्त्रणमा लिएको छ । जिल्ला प्रहरी कार्यालयका प्रवक्ता प्रहरी नायब उपरीक्षक योगेन्द्र तिमिल्सिनाले घटनाबारे अनुसन्धान जारी रहेको बताउदै सत्यतथ्य खुल्न बाँकी रहेको बताए । कुकुर सम्बन्धी विवादबारे प्रहरीमा पूर्व जानकारी नआएको उनले बताए ।
