बैशाख ०४ धनगढी । सुदूर नेपाल संस्कृति सेवा समाजले बैशाख कृष्ण औंसी अर्थात् मातातीर्थ औंशीको अवसरमा ज्येष्ठ आमाहरूलाई सम्मान गरेको छ । ’धर्म संस्कृति जोगाऔँ, आफ्नो अस्तित्व बचाऔँ’ भन्ने नाराका साथ आयोजना गरिएको कार्यक्रममा ७९ वर्ष देखि ८० वर्षभन्दा माथिका आमाहरूलाई विशेष सम्मान गरिएको हो ।
समाजका अनुसार पछिल्लो समय छोराछोरी आफ्नो काममा व्यस्त रहने र बाँकी समय सामाजिक सञ्जालमै बिताउने प्रवृत्ति बढ्दो क्रममा रहेकाले आमाबुवालाई समय दिन नसक्ने अवस्था सिर्जना भएको छ । त्यसैले सचेत गराउँदै परिवारका सदस्यहरूलाई आमाबुवाको महत्व बुझाउन यस्तो कार्यक्रम आयोजना गरिएको बताइएको छ ।
सम्मान कार्यक्रममा सहभागी एक जना ज्येष्ठ आमाले आफ्ना सन्तानले वृद्ध आमाबुवालाई वृद्धाश्रममा छोडेको खबर सुन्दा निकै दुःख लाग्ने गरेको बताइन् । उनले भविष्यमा आफूमाथि पनि यस्तै अवस्था आउला कि भन्ने चिन्ता व्यक्त गरिन् । आमाबुवाको चाहना भनेको सन्तानले केही समय आफ्नै साथमा बिताइदिउन् भन्ने रहेको उनले बताइन । पारिवारिक विवाद र दूरीका कारण सम्बन्ध कमजोर बन्दै गएको गुनासो पनि कार्यक्रममा उठाइएको थियो ।
बाँचुन्जेल सबैले मिलेर जीवन बिताउन ुपर्ने ज्येष्ठ आमाहरूको धारणा थियो । लक्ष्मीनारायण मन्दिरका गुरु कृष्ण प्रपन्नाचार्यले वृद्ध अवस्थाका आमाबुवाको मन दुखाउनु जीवनकै ठूलो पाप हुने बताए । आमा भगवतीको स्वरूप हुन्, र उनीहरूलाई सन्तुष्ट पार्न सके जीवन सफल र अर्थपूर्ण हुने उनले बताए ।
धर्मशास्त्रले आमालाई ‘जगत् जननी’को रूपमा व्याख्या गरेको उनले स्मरण गराए । २०७८ साल देखि सामाजिक कार्यमा सक्रिय रहेको संस्थाले नयाँ पुस्तालाई पारिवारिक मूल्य र सामाजिक उत्तरदायित्वबारे सचेत गराउने उद्देश्यले कार्यक्रम आयोजना गरेको समाजका अध्यक्ष हेम अधिकारीले जानकारी गराए ।
मन्दिर परिसरमा सम्मान पाउँदा ज्येष्ठ आमाहरू अत्यन्तै खुसी देखिएका थिए । उनीहरूले परिवारमा एकता र सद्भाव कायम रहोस् भन्ने कामना व्यक्त गरेका थिए । साथै, आमाबुवाको अवस्था बुझ्नु र उनीहरूको उचित हेरचाह गर्नु सन्तानको नैतिक कर्तव्य भएको सन्देश कार्यक्रममा दिइएको थियो ।
