पौष १८ बझाङ । खप्तड छान्ना गाउँपालिका वडा नम्बर–३ दारुगाउँमा नेपाल टेलिकमको नयाँ टावर र फोरजी सेवा सञ्चालनमा आएपछि स्थानीयको संचार समस्या हटेको छ । यसअघि दिनको केही घण्टामात्र फोन लाग्ने र बाँकी समय गाउँ सम्पर्कविहीन हुने गरेको अबश्थामा फोरजी सेवा सञ्चालनमा आएपछि स्थानीयको संचार समस्या हटेको हो ।
दारुगाउँमा होमस्टे सञ्चालन गर्दै आएका धनराज खड्काले नेटवर्क नहुँदा पाहुनासँग सम्पर्क गर्न नसक्दा समस्या भोग्नुपरेको बताए । अहिले २४ सै घण्टा फोन र इन्टरनेट चल्न थालेपछि स्थानीयलाई ठूलो राहत मिलेको उनले बताए ।
दारुगाउँ जस्तै बझाङका अन्य दुर्गम बस्तीहरूमा पनि टेलिकमले सेवा विस्तार गरेपछि टेलिफोन र इन्टरनेट सहज बनेको बताइृएको छ ।
तिहारपछि तल्कोट गाउँपालीका वडा नम्बर–४ को लोकण्ड, वडा नम्बर १ को सुनिकोट, छबिस पाथीभरा गाउँपालीका वडा नम्बर–४, जयपृथ्वी नगरपालिका वडा नम्बर–१ को कैलास पिमी, वडा नम्बर ५ को कोटेली र सुर्मा गाउँपालिकामा नयाँ टावर सञ्चालनमा आएका छन् ।
पहिला नेटवर्क टिप्न घण्टौँ हिँड्नु पर्ने अवस्था रहेको सुर्मा गाउँपालिकाका भीम बोहराले टावर बनेपछि घरमै इन्टरनेट चल्न थालेको बताए । नेपाल टेलिकमका अनुसार कमजोर नेटवर्क भएका क्षेत्रमा नयाँ टावर निर्माण र फोरजी क्षमता विस्तार भइरहेको छ । थलारा, छबिसपाथीभरा र बित्थडचिरका टावरमा उच्च क्षमताको उपकरण जडान गरिएपछि इन्टरनेटको गति बढेको बताईएको छ ।
