साउन २५ धनगढी । नेपाली काँग्रेसको भातृ संस्था नेपाल महिला संघ, कैलालीले संघको ७८ औँ स्थापना दिवस धनगढीमा अन्तर संवाद र लक्षित समुदायलाई फलफूल वितरण गरी मनाइएको छ ।
देशमा जहानिया राणाशासनको ज्यादती, निरंकुशता, मनपरीतंत्र रहेको बेला नेपाली जनताले मानवाधिकार, नागरिक अधिकारको कल्पना समेत गर्न नसक्ने अवस्थामा स्थापना भएकोे नेपाल महिला संघकोे ७८ औँ स्थापना दिवस धनगढीमा अन्तर संवाद र लक्षित समुदायलाई फलफूल वितरण गरी मनाइएको हो ।
नेपाली काँग्रेसका केन्द्रिय सदस्य सुशिला भट्ट मिश्रको प्रमुख आथित्यतामा ७८ औँ स्थापना दिवस मनाइएको हो । प्रमुख अथिती मीश्रले शिक्षा केवल शासक दरवारिया वर्गको लागि मात्र भएको र नेपाली जनता दास र रैतीको अवस्थामा बाच्न बाध्य भएको समयमा जनाधिकार, स्वतंत्रता, स्वाधिनता र समानताका सवालमा आवाज उठाउन नेपाल महिला संघको स्थापना भएको बताईन ।
आज पनि समाजमा महिलाको स्थान सम्मान जनक अबश्था नभएको बताउदै उनले समाजमा व्याप्त कुरीति र अन्धविश्वासले महिला उत्पिडनको समस्या समाधान हुन नसकेको बताईन । वि.सं. २००४ साल श्रावण २४ गते मंगलादेवीसिंह जस्ता वीरांगनाहरूले नेपाल महिला संघको स्थापना गरेको उनले जानकारी गराईन ।
देशको प्रजातान्त्रिक आन्दोलनमा समानता र स्वतन्त्रताको साहसिक आवाज बुलंद गर्दै २००७ सालको जनक्रान्तिमा महिला संघले निर्णायक भूमिका निर्वाह गरेको कुरा नेपालको राजनैतिक आन्दोलनमा स्वर्णीम अक्षरले अंकित भएको उनले बताईन । त्यसैगरी कार्यक्रमका बक्ताहरुले नेपाल महिला संघ र संस्थापकहरूको योगदानको श्रद्धापूर्वक स्मरण र चर्चा गरेका थिए ।
नेपाल महिला संघले गणतान्त्रिक व्यवस्थाको आधार निर्माण गर्न र पछिल्लो पुस्ताले गणतन्त्र स्थापना गर्न गौरवपूर्ण योगदान , त्याग र बलिदान गरेको र प्राप्त महिला अधिकार संरक्षण र कार्यान्वन गर्न महिला संघ खवरदारी गर्ने भूमिकामा सशक्त भैरहनु पर्नेमा वक्ताहरूले जोड दिएका थिए ।
महिला अधिकारको संरक्षण, संबद्र्धन र कार्यान्वय गर्न लोकतान्त्रिक प्रणाली सुदृढ हुनुपर्ने र त्यसका लागि देशको एकमात्र वैचारिक लोकातान्त्रिक पार्टी नेपाली काँग्रेस बलियो भएमात्र सबै पछाडी पारिएका तह, तप्का, वर्ग र समुदायको सशक्तीकरण र उत्थान हुने भएकोले काँग्रेस पार्टीलाई सुदृढ बनाउन नेपाल महिला संघ लगायत सबै शुभेच्छुक र भातृ संस्थाहरू अझै बढी कृयाशील हुनुपर्ने विचारमा वक्ताहरूको समर्थन रहेको थियो ।
कार्यक्रममा सुदूरपश्चिम प्रदेश नीति तथा योजना आयोगकी अध्यक्ष एवम् नेपाली काँग्रेसकी केन्द्रिय सदस्य जीवन राना, पूर्ब राज्यमन्त्री टेकहादुर रैका, माननीय सांसद तुलसी देवकोटा,सुदूरपश्चिम प्रदेश सदस्य रामबहादुर देउवा नेपाली कांग्रेस क्षेत्र नम्बर ४ का सभापती ललित रोकाया, नेपाली काँग्रेस सुदूरपश्चिम प्रदेशका प्रवक्ता सुरत रावत डोटेली कान्छा, नेपाली काँग्रेसका कार्यवाहक सभापति रोशन सिंह, पार्टी सचिव एवम् आयोग सदस्य नृपबहादुर सुनार, पार्टी सचिव केशव मिश्र, पार्टी क्षेत्रीय सभापति भीम पडाल, प्रदेश सदस्य लक्ष्मी भण्डारी, पूर्व क्षेत्रीय सभापती हरिश खड्का, नेपाल ट्रेडयुनियन काँग्रेसका केन्द्रीय सदस्य शान्ति सिंह शाही, नेपाल प्रेस युनियनका पूर्व अध्यक्ष श्रवण देउवा, पत्रकार भावना जोशी लगायत पार्टीका नेता, शुभेच्छुक तथा भातृसंस्थाका विभिन्न तहका सदस्य एवम् पदाधिकारी र महिला संघका विभिन्न तहका नेता र सदस्यहरूको उपस्थिती रहेको थियो ।
संघले धनगढी स्थित मानव सेवा आश्रममा आश्रित असहाय र आमाको माया छात्रवासका विद्यार्थीहरूलाई फलफूल वितरण गरेको थियो । नेपाल महिला संघका कैलाली जिल्ला अध्यक्ष शारदा सुनामको अध्यक्षतामा सम्पन्न कार्यक्रममा स्वागत मन्तव्य नगर अध्यक्ष जागृति बोगटीले राखेकी थिईन भने कार्यक्रमको संचालन सरस्वती खड्काले गरेकी थिईन ।
