साउन २० धनगढी । सुदूरपश्चिम प्रदेशका मुख्यमन्त्री कमलबहादुर शाह नेतृत्वको सरकारको एक वर्ष कार्यकाल पुरा भएको छ । गत वर्ष साउन २० गते दोस्रो पटक मुख्यमन्त्री भएका शाह नेतृत्वको सरकारको मंगलबार एक वर्ष पुरा भएको हो ।
तत्कालीन मुख्यमन्त्री दीर्घ बहादुर सोडारीले बहुमत जुटाउन नसक्दा पदबाट राजीनामा दिए पछि गत वर्ष साउन २० गते शाह दोस्रो पटक मुख्यमन्त्रीमा नियुक्त भएका थिए ।
प्रदेश प्रमुखले मुख्यमन्त्री नियुक्तिका लागि दाबी पेश गर्न आह्वान गरेको समय सीमामा नागरिक उन्मुक्ति पार्टीका दुई जनाले मुख्यमन्त्री नियुक्तिका लागि दाबी पेश गरेपछि नेपाली कांग्रेसका शाहले बाजी मारेका थिए ।
नागरिक उन्मुक्ति पार्टीबाट मुख्यमन्त्री नियुक्ति हुन नसके पछि प्रदेश सभामा सबैभन्दा ठुलो दलको संसदीय दलका नेताका हैसियतले शाहलाई मुख्यमन्त्री बन्ने अवसर मिलेको थियो ।
मंगलबार पत्रकार सम्मेलनको आयोजना गर्दै मुख्यमन्त्री शाहले सरकारको एक वर्ष कार्यकालको उपलब्धिहरू सार्वजनिक गरेका छन् । उनले आफ्नो सरकारको एक वर्षे कार्यकालमा महत्त्वपूर्ण उपलब्धिहरू हासिल गरेको बताएका छन् ।
एक वर्षे प्रगति प्रतिवेदन सुनाउँदै उनले आफू नेतृत्वको सरकारले साक्षर प्रदेश घोषणा गरेको बताउदै यस वर्ष कानुन निर्माण तर्फ १८ वटा ऐन नियम, निर्देशिका तथा कार्यविधिहरू जारी गरिएको बताए ।
त्यसका साथै प्रदेश सरकारको खर्च गर्ने क्षमतामा पनि वृद्धि भएको उनले बताए । ‘अनेक चुनौती र कठिनाइको सामना गर्दै आर्थिक वर्ष २०८१÷०८२ मा प्रदेशको खर्च गर्ने क्षमतामा वृद्धि गर्दै ७० दशमलव २२ प्रतिशत वित्तीय प्रगति हासिल गर्न सक्षम भएको जानकारी गराउदै उनले प्रदेश सरकारको अहिले सम्मको उच्च उपलब्धि भएको बताए ।
राष्ट्रिय प्राकृतिक स्रोत तथा वित्त आयोगले गरेको विभिन्न ११ वटा सूचकको आधारमा कार्यसम्पादन मूल्याङ्कनबाट सबै प्रदेशहरू मध्ये ५१ दशमलव ६ प्रतिशत अंक हासिल गरी सुदूरपश्चिम प्रदेश प्रथम बनेको समेत उनले जानकारी गराए । गत वर्ष प्रदेश सरकारले विभिन्न किसिमका करिब ३ सय ५५ किलोमिटर सडकहरू निर्माण गरेको मुख्यमन्त्री शाहले बताए ।
त्यर्सैगरी प्रदेश सरकारले १ सय ६ किलोमिटर कालोपत्रे, १ सय ३ किलोमिटर ग्राभेल र १ सय ४६ किलोमिटर कच्ची सडक गरी ३ सय ५५ किलोमिटर सडक मर्मत गरेको उनले जानकारी गराए ।
गत वर्ष प्रदेश सरकारले १ लाख बढी जनसङ्ख्यालाई खानेपानीको सुविधा दिएको मुख्यमन्त्री शाहले जानकारी गराए । पत्रकार सम्मेलनमा बोल्दै उनले २०८२ असार मसान्त सम्म थप १ लाख ३ हजार ५ सय २४ जनसङ्ख्यालाई खानेपानी सुविधा थप गरिएको बताए ।
खानेपानीका ८ सय ४१ वटा इन्टेक जडान, ५ सय १६ वटा पोखरी निर्माण, २ हजार १ सय ३३ किलोमिटर पाइपलाइन जडान लगायतका कार्य गरेको उनले जानकारी गराए । त्यसका साथै ११ हजार ९ सय ३९ निजी धारा जडान गरिएको उनले जानकारी गराए ।
त्यसैगरी खानेपानी सुशासन तथा पूर्वाधार सहयोग आयोजना अन्तर्गत नेपाल सरकार खानेपानी मन्त्रालय र सुदूरपश्चिम प्रदेश सरकारबीच लागत साझेदारीमा प्रदेशको कैलाली र डोटीका विभिन्न पालिकामा १३ अर्ब ३८ करोड ७० लाख रकम बराबरको आयोजना सञ्चालन सम्बन्धी समझदारी पत्रमा हस्ताक्षर भई आयोजनाको काम सुरुवात गरिएको मुख्य मन्त्री शाहले जानकारी गराए ।
त्यसैगरी अन्तर्राष्ट्रिय विकास संस्था आइडिए र नेपाल सरकार बिच भएको खानेपानी सुशासन तथा पूर्वाधार सहयोग आयोजना सञ्चालन गर्ने सम्बन्धी सम्झौता अनुसार कैलालीका ३ र डोटीको एउटा पालिकामा आयोजना सञ्चालनका लागि समझदारी पत्रमा हस्ताक्षर भएको मुख्य मन्त्री शाहले जानकारी गराए ।
उक्त आयोजना कैलालीको जानकी, बर्दगोरीया र जोशीपुर गाउँपालिका र डोटीको दिपायल सिलगढी नगरपालिकामा सञ्चालन गरिने उनले जानकारी गराए । गत आर्थिक वर्षमा १ हजार ६ सय २८ हेक्टर जमिनमा सिँचाई सुविधा थप गरिएको जानकारी गराउदै मुख्य मन्त्री शाहले २७ किलोमिटर तटबन्ध निर्माणका साथै २७ हेक्टर जमिन नदी कटानबाट जोगाउन सकिएको बताए ।
