साउन १२ धनगढी । सुदूरपश्चिम प्रदेश सभाका सभामुख भीमबहादुर भण्डारीले प्रदेश सभामा उठेका विषयमा सात दिन भित्र जवाफ दिन प्रदेश सरकारलाई निर्देशन दिएका छन । प्रदेश सभा सदस्यहरूले सभामा उठाएको विषयमा जवाफ दिन सभामुख भण्डारीले प्रदेश सरकारलाई निर्देशन दिएका हुन ।
आइतबार र सोमबार गरी दुई दिनको बैठकमा समसामयिक विषयमा बोल्नका लागि प्रदेश सभा सदस्यहरूलाई समय उपलब्ध गराइएको थियो । छलफलमा नागरिक उन्मुक्ति पार्टीका संसदीय दलको नेता घनश्याम चौधरीले किसानलाई तत्काल रासायनिक मलको व्यवस्था गर्न प्रदेश सरकारलाई आग्रह गरेका थिए ।
मल नपाएर उत्पादन घट्ने चिन्तामा किसान रहेको बताउदै उनले प्रदेश सरकारले किसानका समस्या सुन्न नचाहेको बताए । किसानले चैते धानको मूल्य नपाएको भन्दै उनले सरकारको ध्यानाकर्षण गराएका छन ।
त्यसैगरी, चक्रबहादुर मल्लले चुरे क्षेत्र अतिक्रमणको चपेटामा परेको बताए । बेलैमा अतिक्रमणलाई नियमन र नियन्त्रण गर्न नसके त्यसले दीर्घकालीन असर गर्ने उनले बताए ।
चुरे अतिक्रमणले तराईको बस्ती र कृषियोग्य जमिनलाई सबैभन्दा बढी असर हुने बताउदै मल्लले चुरे संरक्षणमा तीन तहकै सरकार उदासीन रहेको बताए । प्र्रदेश सभा सदस्य सन्तोषकुमारी शर्मा थापाले सुदूरपश्चिम प्रदेशमा महिला असुरक्षित भएको बताईन ।
उनले महिला हिंसाविरुद्धको कानुन प्रभावकारी रूपमा कार्यान्वयन गर्न सरकारलाई आग्रह गरिन । प्रदेशको प्रत्येक पालिकामा महिला सहायता डेस्क र सेफ हाउस सञ्चालन हुनुपर्ने शर्माले बताईन ।
महिला हिंसा घटनाका अपराधीलाई तत्काल कानुनी कठघरामा उभ्याउन सक्नुपर्ने उनले बताईन । शर्माले महालेखा परीक्षकको प्रतिवेदन सभामा प्रस्तुत गर्न प्रदेश सरकारलाई आग्रह गरिन ।
