असार ८ बाजुरा । बाजुराको छेडेदह तालको संरक्षण तथा प्रवद्र्वनका लागि संस्कृति, पर्यटन तथा नागरिक उड्डयन मन्त्रालयले बजेट विनियोजन गरेको छ । बाजुराको पर्यटकीय क्षेत्रका रुपमा रहेको छेडेदह तालको संरक्षण गर्न संस्कृति, पर्यटन तथा नागरिक उड्डयन मन्त्रालयले आवश्यक बजेट विनियोजन गरेको हो ।
पर्यटनमन्त्री बद्रीप्रसाद पाण्डेका मुख्य स्वकीय सचिव ताल बहादुर रावतले छेडेदह तालमा संरचना निर्माण तथा सौन्दर्यकरणका लागि २० लाख बजेट विनियोजन गरिएको जानकारी गराए । छेडेदह ताल सहित खप्तड, बडालेख, कालाजाग्रा लगायतका पर्यटकीय स्थलका लागि ३ करोड बजेट विनियोजन गरिएको उनले जानकारी गराए ।
लामो समय देखि पहिरोको चपेटामा परेको छेडेदह तालको संरक्षण तथा प्रवद्र्वनका लागि मन्त्रालयबाट बजेट विनियोजन गरिएको मन्त्रीका मुख्य स्वकीय सचिव रावतले बताए ।
त्यसैगरी छेडेदह तालको अनुगमन गरी संरक्षणमा सहयोग गरीदिन भन्दै मंगलवार खप्तड छेडेदह गाउँपालिकाले पर्यटन मन्त्रालयलाई पत्राचार समेत गरेको छ । खप्तड छेडेदह गाउँपालीका वडा नम्बर ४ र ७ को विचमा पर्ने छेडेदह तालबाटै गाउँपालिकाको नामाकरण गरिएको गाउँपालिकाले जनाएको छ ।
साविकको गुदुखाती गाविसको वडा नम्बरं ९ खातीगाउँ र आटीचौर गाविसको वडा नम्बरं–१ लम्गाउँका स्थानीय बीच लामो समय देखिको सिमाना विवाद समाधान हुन नसक्दा हालसम्म निकासमा पुग्न नसकेको गाउँपालिकाले जनाएको छ ।
खप्तड छेडेदह मात्रै नभई बाजुरा जिल्लाकै पर्यटकीय गहनाका रुपमा रहेको छेडेदह तालको पहिरो रोकथाम गरी संरक्षण तथा प्रवद्र्धन हुन नसके यसको अस्तित्व नै संकटमा पर्ने बताइृएको छ ।
प्राकृतिक सौन्दर्यताले भरिपूर्ण छेडेदह तालको संरक्षणका लागि बर्षेनी बजेट आएपनि सही सदुपयोग नहुने गरेको र सिमाना विवादले नै ओझेलमा पर्दै आएको स्थानीयले बताएका छन् । सिमानामा देखिएको विवाद समाधान गर्न स्थानीय जनप्रतिनिधिहरुले अग्रसर बनेर तालको संरक्षणमा लाग्नुपर्ने उनीहरुले बताएका छन ।
