जेठ २८ धनगढी । नेकपा एमालेका केन्द्रीय सचिव तथा सुदूरपश्चिम प्रदेश इन्चार्ज लेखराज भट्टले पार्टीभित्र एकता कायम नभए हाल प्राप्त दुई सिट समेत गुमाएर पार्टी शून्य सिटमा झर्न सक्ने बताएका छन । नेपाल खेलकुद महासङ्घ सुदूरपश्चिम प्रदेशको दोस्रो अधिवेशनलाई सम्बोधन गर्दै सचिव भट्टले यस्तो बताएका हुन ।
पार्टी भित्र एकता भए सुदूरपश्चिम प्रदेशका १६ बटै प्रतिनिधिसभा निर्वाचन क्षेत्रमा जित्न सकिने बताउदै एकता नहुँदा हाल प्राप्त दुई वटा सिट समेत गुमाएर पार्टी शून्य सिटमा झर्न सक्ने बताए । पार्टीमाथि आन्तरिक र बाह्य दुवै कोणबाट आक्रमण भइरहेको बताउदै उनले यस्तोे अवस्थामा जनवर्गीय सङ्गठनहरू सक्रिय भएर अग्रपंक्तिमा उभिनु पर्ने बताए ।
पार्टी सङ्कटमा पर्दा सबैले अग्रपंक्तिमा उभिनुपर्ने बताउदै उनले एमाले अहिले पनि बलियो बन्दै गएको बताए । सचिव भट्टले पार्टी अध्यक्षको आत्मबल र सक्रियता सबैका लागि प्रेरणादायी भएको बताउदै देश निर्माणमा समर्पित भएर दिनको २० घण्टा काम गर्दै आएको बताए ।
नेतृत्वबाट खेलाडीहरूले पनि प्रेरणा लिनुपर्ने बताउदै उनले समृद्ध नेपाल, सुखी नेपाली’ अभियानलाई आत्मनिर्भर भएर अघि बढाउन सबैलाई पार्टीभित्र अनुशासन र एकताको भावना आत्मसात् गर्नु पर्ने बताए ।
त्यसैगरी नेपाल खेलकुद महासङ्घका केन्द्रीय उपाध्यक्ष दीपेन्द्र दाहालले पार्टीमा सङ्कट उत्पन्न भएका बेला महासङ्घको भूमिका महत्त्वपूर्ण हुने बताउँदै आगामी निर्वाचनमा एमालेलाई सशक्त बनाउन महासङ्घले सक्दो योगदान दिने बताए ।
नेकपा एमाले पोलिटब्युरो सदस्य तथा सुदूरपश्चिम प्रदेशका पूर्व मुख्यमन्त्री राजेन्द्रसिंह रावलले सुदूरपश्चिम प्रदेशमा खेलकुद र खेलाडीहरूको ठुलो सम्भावना रहेको बताए । उनले समृद्धिका लागि खेलकुदलाई आर्थिक र सामाजिक विकाससँग जोड्नुपर्ने बताए ।
विशेषगरी क्रिकेट खेलमा ठुलो सम्भावना रहेको बताउदै उनले स्तरीय क्रिकेट मैदान निर्माणको आवश्यकता रहेको बताए । त्यसैगरी प्रदेश अध्यक्ष कृष्णप्रसाद जैशीले एमालेले पछिल्लो समय खेलकुद क्षेत्रलाई प्राथमिकतामा राखेको बताउदै सुदूरपश्चिम प्रदेशको खेलकुद नीति निर्माणमा सरकार र सम्बन्धित निकायहरू गम्भीर हुनुपर्ने बताए ।
उनले सुदूरपश्चिममा खेलकुदको पूर्वाधार र नीतिगत सुधारमा राज्यको ध्यान केन्द्रित गरिनु आवश्यक रहेको बताए । खेलकुद महासङ्घका केन्द्रीय सचिव तथा सुदूरपश्चिम इन्चार्ज विष्णु चन्दले सुदूरपश्चिमको खेलकुद विकासका लागि महासङ्घ निरन्तर लागिरहेको बताए ।
कार्यक्रममा विभिन्न खेलकुदसँग सम्बन्धित व्यक्तित्वहरूलाई सम्मान गरिएको थियो । महासंघका अध्यक्ष प्रकाश चन्दले सुदूरपश्चिमको खेलकुद क्षेत्रको विकास र खेलाडीहरूको क्षमता अभिवृद्धिमा महासंघ निरन्तर क्रियाशील रहेको बताए । उनले नयाँ नेतृत्वले पनि यस अभियानलाई निरन्तरता दिने बताए ।
