मंसिर ०७ धनगढी । कैलाली र कञ्चनपुरमा अवैध माछा सहित सामान प्रहरीले बरामद गरेको छ ।
कैलालीको धनगढी वडा नम्बर २ मिलन चोक, धनगढी नम्बर ३ ट्राफिक चौहारा, धनगढी नम्बर ४ उत्तरबेहडी, धनगढी नम्बर ९ त्रीवेणीघाट, टीकापुर नगरपालिका नम्बर १ मनुवा र जोशीपुर गाउापालिका नम्बर १ पिपरकोटीबाट अवैध रुपमा भारतबाट भन्सार छली ल्याएको अन्दाजी १ लाख २० हजार ६ सय १० मूल्यको सामान प्रहरीले बरामद गरेको हो ।
प्याज, चिनी, मिश्री, मिठाई, चक्लेट, केराउ, सरप, चप्पल, सल, अण्डरवेयर, टाउजर, ज्याकेट, प्लाष्टिक डोरी, प्लाष्टिक झिल्ली, माछा लगायतका सामानहरु जिल्ला प्रहरी कार्यालय कैलाली तथा मातहत कार्यालयहरुबाट खटिएको प्रहरी गस्ती टोलीले बेवारिसे अवस्थामा फेला पारी नियन्त्रणमा लिएको प्रहरीले जानकारी गराएको हो ।
त्यसैगरी कञ्चनपुरको बेलौरी नगरपालिका वडा नम्बर ६ भुराकोटमा भारतबाट भन्सार छली ल्याएको अन्दाजी ६० हजार मूल्यको माछा इलाका प्रहरी कार्यालय बेलौरीबाट खटिएको गस्ती टोलीले बेवारिसे अवस्थामा फेला पारी जनप्रतिनिधि, स्थानीयहरुको रहोबरमा नष्ट गरेको प्रहरीले जानकारी गराएको छ ।
