असार ०९ धनगढी । कैलालीको जानकी गाउँपालिकाले वडा अध्यक्षहरुलाई भ्रमण भत्ताका नाममा लाखौँ रकम बाँडेको छ । आर्थिक बर्ष २०७९÷८० को महालेखा परिक्षकको प्रतिवेदनमा उल्लेख भए अनुसार जानकी गाउँपालिकाले वडा अध्यक्षहरुलाई भ्रमण भत्ता वाफत २ लाख २६ हजार ८ सय ५० रुपयाँ बाडेको हो ।
भ्रमण भत्ताका नाममा कमल महतो, शुरेस चौधरीलाई ४३ हजार ३ सय, इन्द्र चौधरीलाई ४० हजार ८ सय, खकेन्द्र भण्डारीलाई २४ हजार ४ सय ५०, दिपेन्द्र कुमार कठरियालाई २४ हजार १ सय रुपयाँ गाउँपालिकाले भुक्तानी दिएको छ । त्यसैगरी वडा सदस्य शुसिल कठरियालाई १७ हजार ५०, सदस्य मोहन कुमार डगौरालाई ६ हजार २ सय ५० भ्रमण भत्ता दिइएको छ ।
वडा अध्यक्ष भिम बहादुर चौधरी, शुरेस चौधरी, कमल महतो र दिपेन्द्र बहादुर कठरियालाई अर्को मितिमा फेरी जनही ६ हजार ९ सय भ्रमण भत्ता गाउँपालिकाले दिएको छ । वडा अध्यक्ष र २ जना सदस्य गरी उक्त आर्थिक बर्षमा गाउँपालिकाले २ लाख २६ हजार ८ सय ५० रुपयाँ भ्रमण भत्ता उपलब्ध गराएको छ । स्थानिय सरकार सञ्चालन ऐन २०७४ को दफा १२ मा वडा समितिको काम कर्तब्य अधिकार निर्धारण गरेको छ ।
भ्रमण खर्च नियमावली २०६४ को नियम ४(१) मा सरकारी खर्चमा भ्रमण गर्ने पदाधिकारी वा कर्मचारीले सकेसम्म कम खर्चिलो र किफायती बाटो वा सवारी साधन प्रयोग गरी खर्च गर्नुपर्ने उल्लेख छ ।
महालेखाले जानकी गाउपालिकाका जनप्रतिनिधी अथवा कर्मचारीले भ्रमण गर्दा उद्देश्यमा आफ्नो काम कर्तब्य र अधिकारमा उल्लेख नभएको सघिंय मन्त्रालयमा योजना माग गर्न, कार्यालयको कामले सघिंय मन्त्रालय काठमाण्डौँ गएको भ्रमण उद्देश्य देखाई उक्त रकम बुझेको देखाएको छ ।
कार्यालयसगं सम्बन्धीत नरहेको हवाई भाडा समेत लिनु गलत भएको भन्दै महालेखाले यस्ता फजुल खर्च रोक्न सुझाव दिएको छ । जानकी गाउँपालिकाका अध्यक्ष गणेस चौधरी तथा उपाध्यक्ष लालमती देवी कठरिया सहित कार्यपालिका सदस्यमा नागरिक उन्मुक्ती पार्टीका रहेका छन ।
