बैशाख २४ बैतडी । बैतडीमा पाँच दिनमा १ सय ५२ जना कुपोषित बालबालिका भेटिएका छन । वैशाख १५ गते देखि सञ्चालन भएको राष्ट्रिय पोषण लेखाजोखा अभियानको पाँच दिनमा १ सय ५२ जना कुपोषित बालबालिका भेटिएका हुन । जसमध्ये १९ जना कडा कुपोषणबाट प्रभावित रहेको स्वास्थ्य कार्यालय बैतडीले जानकारी गराएको छ ।
वैशाख १५ देखि ३० गतेसम्म सञ्चालन हुने अभियान अन्तर्गत ६ महिना देखि ५ वर्ष उमेर समूहका करिब २२ हजार बालबालिकाको स्वास्थ्य परीक्षण भइरहेको छ । अभियानकै क्रममा विभिन्न स्थानमा कुपोषणको दर उच्च देखिएको छ । स्वास्थ्य कार्यालय बैतडीका सूचना अधिकारी खगेन्द्र कार्कीका अनुसार सिगास गाउँपालिका वडा नम्बर–२ गाँजरीमा मात्रै चार जना कडा कुपोषित बालबालिका भेटिएका छन् ।
उनीहरूलाई उपचारमा ल्याएर पोषिलो आहार प्रदान गर्ने प्रक्रिया सुरु गरिएको बताईएको छ । कार्कीले कुपोषणका अधिकांश घटनामा गरिबी प्रमुख कारण देखिएको बताए । देशकै अत्यधिक गरिब स्थानीय तहहरू मध्ये एक मानिने सिगास गाउँपालिकामा गरिबी दर ६६ प्रतिशत भन्दा बढी भएको तथ्याङ्क रहेको छ । उनका अनुसार कुपोषण र गरिबीबीचको चक्र तोड्न नसकिए सम्म समस्या समाधान कठिन हुने देखिन्छ ।
कुपोषित बालबालिकामा उमेर अनुसार तौल र उचाइ कम हुने, साथै शारीरिक विकास कमजोर हुने समस्या देखिएको छ । अभियानका क्रममा भेटिएका कुपोषित बालबालिका मध्ये करिब ३७ प्रतिशत दलित समुदायका रहेको तथ्य पनि सार्वजनिक भएको छ । गत वर्ष जिल्लामा एक हजार ९ सय ३४ बालबालिका कुपोषित रहेको तथ्याङ्क रहेकोमा जसमध्ये ३ सय १२ जना कडा कुपोषणका बिरामीलाई स्वास्थ्य संस्था मार्फत उपचार गरिएको थियो ।
स्थानीय तहले गरिबी न्यूनीकरण र पोषणयुक्त आहारको पहुँच विस्तारमा दीर्घकालीन योजना बनाउन आवश्यक रहेको बताए । यसअघि सञ्चालनमा रहेको सुआहारा कार्यक्रम बन्द भएपछि गर्भवती तथा बालबालिकाको पोषण सुधारमा थप चुनौती देखिएको स्वास्थ्यकर्मीहरूले बताएका छन् ।
