बैशाख २४ धनगढी । कैलालीको गोदावरी नगरपालिकामा सञ्चालन गरिएको निःशुल्क स्वास्थ्य शिविरमा १ सय ३१ जनामा सिकलसेल रोगको प्रारम्भिक संकेत भेटिएको छ । नगरपालिकाको स्वास्थ्य शाखाले वडा नम्बर ७, ८ र ९ मा सिकलसेल एनिमिया तथा थालसेमिया पहिचानका लागि सञ्चालन गरेको तीनदिने ‘स्क्रिनिङ’ अभियान निःशुल्क स्वास्थ्य शिविरमा १ सय ३१ जनामा सिकलसेल रोगको प्रारम्भिक संकेत भेटिएको हो ।
स्वास्थ्य शाखा प्रमुख नवराज अवस्थीले शिविरमा ९ सय ४१ जनाको रगत परीक्षण गरिएको जानकारी गराउदै वडा नम्बर ७ स्थित जमुनानगर आधारभूत स्वास्थ्य सेवा केन्द्रमा २ सय ३९ जनाको परीक्षण गर्दा ३४ जनामा सिकलसेल ‘ट्रेट’ देखिएको बताए । त्यसैगरी स्याउले स्वास्थ्य केन्द्रमा गरिएको परीक्षणमा ३ सय ९९ वटा नमूना मध्ये ६७ जनामा पोजेटिभ रिपोर्ट आएको जानकारी गराउदै उनले बेलादेवीपुर स्वास्थ्य केन्द्रमा परीक्षण गरिएका ३ सय ३ जना मध्ये ३० जनामा रोगको संकेत भेटिएको जानकारी गराए ।
प्रारम्भिक चरणमा पोजेटिभ देखिएका सबै नमूनालाई दोस्रो परीक्षणका लागि गेटा आधारभूत स्वास्थ्य सेवा केन्द्र पठाइने उनले जानकारी गराए । दोस्रो परीक्षणमा पनि पुष्टि भए बिरामीलाई आवश्यक उपचार र नियमित निगरानीमा राखिने उनले बताए । स्वास्थ्यकर्मीका अनुसार रानाथारु समुदायमा सिकलसेल गम्भीर जनस्वास्थ्य समस्याका रूपमा फैलिरहेको छ ।
यो वंशाणुगत रोग भएकाले विवाहपूर्व परीक्षण अनिवार्य गर्नुपर्ने उनीहरुले बताएका छन । रोग लागेपछि हाडजोर्नी दुख्ने, अत्यधिक थकान, रगतको कमी लगायत समस्या देखिने स्वाश्थ्यकर्मीहरुले बताएका छन । सरकारले सिकलसेल रोगीलाई वार्षिक एक लाख रुपैयाँसम्म निःशुल्क उपचार सुविधा उपलब्ध गराउँदै आएको छ ।
