असोज ३१ बाजुरा । बाजुराको बुढिगंगा नगरपालिकाले अस्थायी कर्मचारीहरु हटाउने निर्णय गरेको छ । नगरपालिकाले पालिका र वडाहरुमा कार्यरत अस्थायी कर्मचारीहरुलाई हटाउने निर्णय गरेको हो ।
बिहीबार बसेको ४९ औँ कार्यपालिका बैठकले नगरपालिकामा कार्यरत झन्डै ८० जना अस्थायी कर्मचारीको कार्तिक १ गते देखि म्याद थप नगर्ने निर्णय गरेको छ ।
नगरपालिकाका प्रवक्ता एवम् वडा नंम्बर ६ का अध्यक्ष हेमराज जैशीले कार्यपालिका बैठकले अस्थायी कर्मचारी हटाउने निर्णय गरेको जनकारी गराएका हुन ।
पालिकाले सङ्घीय सरकार र प्रदेश सरकारको पत्र अनुरूप पालिकामा कार्यरत अस्थायी कर्मचारीको म्याद थप नगर्ने, जेनजी आन्दोलनमा घाइतेको शीघ्र स्वास्थ्य लाभको कामना गर्ने लगायतका निर्णय गरेको उनले बताए ।
बुढीगङ्गा नगरपालिकामा हाल ८० जना कर्मचारीलाई विकासीय बजेटबाट तलब प्रदान गरिँदै आएको उनले जानकारी गराए । पालिकाका १० वटै वडाका गरी ती कर्मचारीलाई हटाउने निर्णय गरेपछि कामकाजमा केही समस्या हुने बताईएको छ ।
यद्यपि स्थायी दरबन्दी भएका कर्मचारीबाट नियमित रूपमा सेवा प्रदान गरिने कार्यपालिका बैठकले निर्णय गरेको छ ।
