भदौ १४ धनगढी । सुदूरपश्चिमको मुख्य पर्यटकीय गन्तव्य खप्तडमा पर्यटकको आवास सुविधाका लागि ६ वर्ष अघि देखि निर्माणाधीन भवन अझै प्रयोगमा आउन सकेका छैनन ।
सुविधायुक्त आवासको अभावमा ‘भूस्वर्ग’का नामले चर्चित खप्तड पुगेका पर्यटक अव्यवस्थित बसाइको तितो अनुभव बोकेर फर्कने गरेका भए पनि निर्माणाधीन भवन अझै प्रयोगमा आउन नसकेका हुन ।
खप्तड राष्ट्रिय निकुञ्जको मुख्य ब्यारेक नजिक बन्न लागेको ८० बेड र डोटीको बाटो भएर आवत जावत गर्ने पर्यटकका लागि बिचपानीमा बन्न लागेको २० बेड क्षमताका ८ वटा भवन ६ वर्षदेखि अलपत्र परेका छन ।
१ सय ५० जना पर्यटकलाई सुविधायुक्त तरिकाले बास बस्न मिल्ने भवन निर्माणको ठेक्का प्रक्रिया २०७६ सालमा नै सुरु भएको थियो ।
नेपाल पर्यटन बोर्डले २०७५÷०७६ मा भवन निर्माणका लागि विनियोजन गरेको ५ करोड रकम मध्येबाट टीडीआर एन्ड बीजी जेभी कम्पनीसँग मूल्य अभिवृद्धि करबाहेक ४ करोड १३ लाखमा ठेक्का सम्झौता भएको थियो ।
खप्तड राष्ट्रिय निकुञ्जले प्रिफ्याब प्रविधिमा आधारित ती भवन निर्माणका लागि उक्त कम्पनीलाई ७ महिना भित्र काम सम्पन्न गर्ने गरी ०७६ चैतमै स्वीकृति दिएको थियो ।
त्यसयता पटक पटक गरी ५ पटक म्याद थप गरेपछि २०८१ सालमा मात्रै उक्त कम्पनीले भवनका संरचनाहरु तयार गरेको थियो । भवन संरचना बने पनि ठेक्काको सर्तबमोजिम खानेपानी जडान, घेरबार, उड फ्लोअरिङ (कोठाभित्र काठ छाप्ने काम), बत्ती जोड्ने लगायतका काम नगरे पछि निकुञ्ज कार्यालयले ठेक्का तोडेको थियो ।
बाँकी काम गर्नका लागि गत वर्ष मंसिरमा गजेन्द्र निर्माण सेवालाई खप्तड र नेत्रेश्वरी निर्माण सेवालाई बिचपानीको भवनको ठेक्का दिइएको थियो । ‘बिचपानीको काम लगभग सकिएको छ ।
खप्तडको भवनमा पनि घेरबारको काम सकेर उड फ्लोअरिङ भैरहेको छ,’ खप्तड राष्ट्रिय निकुञ्जका रेञ्जर परसुराम कठायतले सकेसम्म छिटो काम सम्पन्न गरेर भवनहरु प्रयोगमा ल्याउने गरी निकुञ्जले ताकेता गरिरहेको बताए ।
भवन निर्माणको काम पूर्ण रुपमा सम्पन्न भए पनि व्यवस्थापन कसरी गर्ने भन्ने निक्र्यौल नभएका कारण प्रयोगमा आउन समय लाग्ने उनले बताए ।
