साउन २७ कञ्चनपुर । आठ दिनको उपचार पछि पुनर्जीवन पाएको सानो खैरो गिद्धलाई सोमवार शुक्लाफाँटा राष्ट्रिय निकुञ्जको अर्जुनी फाँटामा छोडीएको छ । टाउको झोक्राएको, हिँडडुल गर्न नसक्ने अवस्थामा रहेको गिद्धलाई कैलालीको लम्की चुहास्थित लालीगुराँस सामुदायिक वनबाट उद्धार गरी आठ दिनको उपचार पछि शुक्लाफाँटा राष्ट्रिय निकुञ्जको अर्जुनी फाँटामा छोडीएको हो ।
सबडिभिजन वन कार्यालय पहलवानपुरका वन अधिकृत शेरबहादुर भण्डारीले गिद्धको अवस्था हेर्दा बाँच्ला जस्तो नलागेको बताउदै उपचारसँगै स्याहार सुसार र आहारमा ध्यान दिइए पछि तन्दुरुस्त भएको बताए । उपचारपछि पिँजडाबाट छाडेपछि पखेटा खोल्दै आकासमा उडेको दृश्य दुर्लभ देखिएको उनले बताए ।
गिद्धलाई निकुञ्जको सुरक्षित स्थानमा लगेर छाड्दा दुई–तीन पाइला हिँड्दै उडेको देखेर निकै खुसी लागेको उनले बताए । ’उडेको दृश्य निकैबेर नियाल्यौँ’,केही बेरको उडान पछि गिद्ध अस्नाको रुखमा पखेटा फिँजाउँदै बसेको दृश्य क्यामेरामा कैद गर्न भ्यायौँ उनले भने ।
सामुदायिक वनका पदाधिकारीले वन क्षेत्रमा गत साउन १९ गते बिरामी अवस्थाको गिद्ध देखापरे पछि डिभिजन वन कार्यालय कैलालीमा खबर गरेको उनले बताए । त्यसपछि गिद्धको उद्धार गरी गाडी मार्फत ल्याएर उपचार गरिएको उनले बताए ।
बिरामी परेको गिद्धको बर्दिया राष्ट्रिय निकुञ्जस्थित प्रकृति संरक्षण कोष(एनटिएनसी) का भेटेरिनरी चिकित्सक विकल्प कार्की सहितको टोलीले आठ दिनसम्म उपचार गरेको उनले बताए ।
पूर्वी नवलपरासीको जटायु रेष्टुराँबाट प्राकृतिक विचरणका लागि उडेको गिद्ध भारतका विभिन्न बस्ती हुँदै कैलालीको लम्की पुगेर बिरामी परेको अवस्थामा फेला परेको नेपाल पन्छी संरक्षण सङ्घ (विसिएन)का चरा विज्ञ हिरुलाल डगौराले बताए ।
वर्षात्का समयमा झुण्डबाट छुट्टिएर लामो दूरी तय गर्दा अर्ध वयस्क सानो खैरो गिद्ध पर्याप्त पानी, आहारा नपाउँदा रगतको कमी भई बिरामी परेको हुनसक्ने उनले
बताए । गिद्धको बाह्य चोटपटक नरहेको उनले जानकारी गराए ।
गत असार २७ गते नवलपुरबाट उडेको गिद्ध सुरूका पाँचदेखि सात दिनसम्म कपिलवस्तुको गैडहवा वन तथा रेस्टुरेन्ट क्षेत्रमै विचरण गरेको पाइएको उनले बताए ।
त्यसपछि गिद्धले कपिलवस्तुको गैडहवाबाट विचरणका लागि भारतको बहराइच, लखिमपुर, टिकुलिया, सीमावर्ती क्षेत्र भजनी हुँदै मसुरियासम्म पुगेर फर्किने क्रममा लाँलीगुरास वनमा बिरामी अवस्थामा फेला परेको उनले बताए ।
गिद्धको खुट्टामा लगाइएको रातो स्याटेलाइट टयाग ‘जे १६’ ले उक्त गिद्धले पूर्वी नवलपरासीको जटायु रेष्टुरेन्टबाट उडान भरेको पुष्टि भएको चरा विज्ञ डगौराले बताए ।
नेपाल पक्षी संरक्षण सङ्घको तथ्याङ्क अनुसार विगत केही वर्षअघि रेष्टुरेन्टकै एक डङ्गुर गिद्धले भारतको पश्चिमी क्षेत्र सहित पाकिस्तान सम्म विचरणका लागि उडान गरेको थियो । नेपाल पक्षी संरक्षण सङ्घ र सबडिभिजन वन कार्यालय लम्कीको टोलीले शुक्लाफाँटा राष्ट्रिय निकुञ्जको सहकार्यमा गिद्धलाई सुरक्षित क्षेत्रमा छाडेको डगौराले जानकारी गराए ।
गिद्ध उपचार पछि स्वस्थ र तन्दुरुस्त भएको बताउदै उनले पुनः पुरानै बासस्थानमा फर्कनेमा विश्वस्त भएको बताए । गिद्धमा जडान गरिएको रेडियो कलरको सहायताले जिपिएस ट्र्याकिङ गरी अवस्थाबारे अध्ययनको कार्य निरन्तर जारी रहने उनले बताए ।
अन्तरराष्ट्रिय प्रकृति संरक्षण सङ्घ(आइयुसिएन)ले यस प्रजातिको गिद्धलाई अतिसङ्कटापन्नको सूचीमा सूचीकृत गरेको उनले बताए ।
