भदौ २६ धनगढी । कैलालीको गोदावरी नगरपालिकामा रहेको एउटा सामुदायिक वनकी अध्यक्षले एकलौटी निर्णय गर्न थाले पछि ११ जना पदाधिकारीले सामुहिक रुपमा राजीनामा दिएका छन् । गोदावरी नगरपालिका वडा नम्बर–४ मा रहेको श्री बासकोटा सामुदायिक वन उभोक्ता समुहकी अध्यक्षले आफुअनुकुल निर्णय गर्न थालेपछि ११ जना पदाधिकारीले सामुहिक रुपमा राजीनामा दिएका हुन् ।
अध्यक्ष कृष्णादेवी जोशीले आफुअनुकुल निर्णय गर्न थालेपछि उपाध्यक्ष सहित कार्यसमितिका सबै सदस्यले पदबाट राजीनामा दिएका हुन । अध्यक्षले मनोमानी रुपमा काठ कटानी देखि ढूवानीसम्म मनोमानी गरेको उनीहरुले आरोप लगाएका छन । अध्यक्ष जोशीले आफ्नै छोरा शिवराज जोशीलाई काठ कटानीको ठेक्का समेत दिएको उनीहरुले बताएका छन । अध्यक्ष जोशीले स्वीकार समेत गरेकी छन् ।
त्यसैगरी वन क्षेत्रबाट निर्णयविपरीत गिट्टी उठाउने, एक अर्काबिच विवाद सिर्जना गराउने लगायतका कारण सामुहिक रुपमा राजीनामा दिएको सचिव टेकबहादुर खड्काले बताए । अध्यक्ष जोशीले गरेका आफु अनुकुलका निर्णयका विषयमा सव–डिभिजन वन कार्यालय अत्तरियालाई लिखित रुपमा निवेदन समेत दिइसकेको उनले बताए । अध्यक्ष जोशीले भने आफुले कुनै पनि निर्णय एकलौटी रुपमा नगरेको दाबी गरेकी छन् ।
अध्यक्ष जोशीका अनुसार नियम संगत तरिकाबाटै साल, सिसम र खैर गरेर २१ वटा रुखको कटानी गरिएको बताईन । रुख कटानीको जिम्मा आफ्नो छोराले पाएको र प्रतिक्युफिट ६४ रुपैयाँ कायम गरिएको उनले बताईन । यस विषयमा सव–डिभिजन वन कार्यालय अत्तरियाका प्रमुख निराजन कँडेलले सुरुमा अध्यक्षप्रति असन्तुष्ट जनाउँदै ११ जनाले साहुहिक रुपमा राजीनामा दिएको र पछि अध्यक्षले पनि राजीनामा दिए पछि साधारण सभा गरिएको उनले बताए ।
११ जना पदाधिकारीले अध्यक्षले उपभोक्ता समितिको निर्णय विपरीत काम गर्ने गरेको तथा एकलौटी रुपमा चल्ने गरेको लगायत आरोप लगाएर सामुहिक रुपमा राजीनामा दिएको खुल्न आएको सव–डिभिजन वन कार्यालय अत्तरियाले जनाएको छ ।
