भदौ ११ धनगढी । प्रहरीले कैलाली र कञ्चनपुरका विभिन्न स्थानहरूबाट नौ लाख ३१ हजार ६ सय बरावरको अवैध भन्सार छलीका सामान बरामद गरेको छ ।
सुदूरपश्चिम प्रदेश प्रहरी कार्यालय, धनगढी कैलालीले दिएको जानकारी अनुसार सोमवार कैलाली जिल्लाको धनगढी उपमहानगरपालिका वडा नम्बर–९, को त्रीवेणीघाट, भजनी नगरपालिका वडा नम्बर–३ को बर्दवाफाँटा, सोही नगरपालिका वडा नम्बर–६ को नवलपुर, टीकापुर नगरपालिका वडा नम्बर–१ को ब्लक नंम्बर १२ नजिक, वडा नम्बर–८ को पायलगाउँ, जोशीपुर गाउँपालिका वडा नम्बर–३ को लक्कड, र जानकी गाउँपालिका वडा नम्बर–४ को झबैपुलबाट अवैध रूपमा भारतबाट भन्सार छली गरी ल्याएको करिब सात लाख १५ हजार रुपैयाँ बराबरको सामान बरामद गरिएको छ ।
प्याज, चिनी, बिडी, सुर्ती, लसुन, साडी, सुटपीस, कुर्ती, मोबाइल चार्जर, एयरफोन लगायतका सामानहरू बरामद गरिएकोे प्रहरीले जनाएको छ । जिल्ला प्रहरी कार्यालय कैलाली तथा मातहत कार्यालयबाट खटिएको प्रहरी टोलीले उक्त सामग्री बेवारिसे अवस्थामा फेला पारी नियन्त्रणमा लिएको प्रदेश प्रहरी कार्यालयले जनाएको छ ।
त्यसैगरी सोमवार कञ्चनपुर जिल्लाको भीमदत्त नगरपालिका वडा नम्बर–५ को सुकासाल, वडा नम्बर–९ को मटेना र वडा नंम्बर ११ को भन्सार कार्यालय नजिकबाट अवैध रूपमा भारतबाट भन्सार छली गरी ल्याएका करिब दुई लाख १६ हजार ६ सय मूल्य बराबरको चिनी, खाने तेल, पेय पदार्थ, दाल, बेसन, सुर्ती, सरप, जिरा, खेलौना, साडी, फोटो फिरेम, फोटो पेपर, गुलाव जामुन, साइकलका सामान, किराना सामान, हार्डवेयरका सामान, प्लाष्टिक झिल्ली लगायतका सामानहरू बरामद गरिएको छ ।
जिल्ला प्रहरी कार्यालय कञ्चनपुर मातहतका कार्यालयहरूबाट खटिएको प्रहरी गस्ती टोलीले बेवारिसे अवस्थामा फेला पारी नियन्त्रणमा लिएको प्रदेश प्रहरी कार्यालयले सार्वजनिक गरेको सूचनामा उल्लेख गरिएको छ ।
