पौष १३ धनगढी । कैलालीको अत्तरियामा आयोजना हुन गैरहेको सुदूरपश्चिम प्रादेशिक महोत्सवको तयारी मुख्य गेटको पूजा गरी सुरु गरिएको छ । अत्तरिया उद्योग वाणिज्य संघको आयोजनामा यही पौष २६ गते देखी सुरु हुन गैरहेको महोत्सवको शुक्रबार मुख्य गेटको पूजा गरी तयारी सुरु गरिएको हो । अत्तरिया उद्योग वाणिज्य संघले प्रयेक वर्ष गर्दै आएको महोत्सवका लागी विभिन्न संरचनाहरु निर्माण गर्ने काम सुरु भएको छ ।
शुक्रबार संघका अध्यक्ष कल्याण सिँह बोहराले महोत्सवको प्रवेशद्धारको पूजा गरेर निर्माण कार्य सुभारम्भ गरेका हुन । माघ ७ गतेसम्म सञ्चालन हुने महोत्सवका लागी विभिन्न उपसमितिहरु समेत गठन गरिएको बताईएको छ । अध्यक्ष बोहराले महोत्सवमा १ सय २० वटा स्टलहरु राखिने जानकारी गराए । आठौँ संस्करणको महोत्सवका लागि विभिन्न तयारीहरु सुरु गरिएको उनले बताए । उनले अन्य विभिन्न ठाउँहरुबाट तयारी भैसकेको र महोत्सव स्थलमा संरचनाहरु निर्माणको कार्य शुक्रबार देखी सुरु भएको बताए ।
समृद्ध प्रदेशको आधार कृषि, पर्यटन र व्यापार भन्ने मुल नाराका साथ आयोजना हुन गैरहेको महोत्सवले स्थानियस्तरका उत्पादनहरुलाई बढी प्राथमिकता दिने संघका महासचिव शंकर खड्काले बताए । उनले विगतका कमिकमजोरीहरुलाई सुधार गर्दै यसपटक नयाँ व्यवस्थापन र उर्जाका साथ महोत्सव सञ्चालन गर्ने गईरहेको बताए । उनका अनुसार महोत्सव सञ्चालनका लागि आवश्यक पर्ने विभिन्न विधाहरुमा यसपटक टेण्डर प्रणाली लागु गरिएको छ ।
महोत्सव अवधीभर आवश्यक पर्ने सुरक्षा व्यवस्थाका लागि पनि यसपटक टेण्डर आह्वान गरिएको उनले बताए । त्यसका साथै प्रिन्टिङ सामग्रीका लागि, निर्माणजन्य सामग्री, क्यामेरा लगायतका कार्यहरुका लागि पनि टेण्डर आह्वान गरिएको महासचिव खड्काले बताए । उनले टेण्डर आह्वान गर्दा संघलाई केही फाईदा पुग्ने देखिएकाले उक्त प्रकृया अपनाईएको बताए । टेण्डर अनुसार सबैभन्दा कम बजेटमा काम गर्न सक्ने फर्म वा व्यक्तिलाई मात्रै यसपटक महोत्सवका विभिन्न जिम्मेवारीहरु दिईएको उनले बताए ।
