कार्तिक १३ दार्चुला । दार्चुलाको पारी पट्टी भारतले सडक निर्माणका क्रममा विष्फोट गराउदा उछिट्टीएको ढुङगा लागेर मृत्यु भएका बालकको परिवारलाई भारतीय पक्षले नेपाली १६ लाख क्षतिपूर्ति दिएको छ ।
दार्चुलाको व्यास गाउँपालिका वडा नम्बर–२ का १२ वर्षीय पवन महराको परिवारलाई भारतीय पक्षले नेपाली १६ लाख क्षतिपूर्ति दिएको हो ।
शनिबार धार्चुलास्थित एसडिएम कार्यालयमा नेपाली प्रशासन र दार्चुलाका जनप्रतिनिधि समेतको टोलिसंगको छलफलपछि तावाघाट–लिपुलेक सडक निर्माण गरिरहेको गर्ग एन्ड गर्ग कम्पनीले पीडित परिवारलाई क्षतिपूर्ति वापत नेपाली १६ लाख रुपैयाँ उपलब्ध गराएको हो । पीडित पक्षसँग भएको सहमती अनुसार गर्ग एन्ड गर्ग कम्पनीले १० लाख भारु उपलब्ध गराएको दार्चुलाका प्रमुख प्रहरी नायब उपरीक्षक तर्कराज पाण्डेले जानकारी गराउनु भयो । डीएसपी पाण्डेका अनुसार उक्त कम्पनीले सडक निर्माणका क्रममा जिलेटिन विस्फोट गर्दा खसेको ढुङगा लागेर बालकको मृत्यु भएको थियो ।
त्यसैगरी सोही घटनामा घाईते र्भएकी उनकी दिदी १४ वर्षीय सरिना महराको जिल्ला अस्पताल दार्चुलामा उपचार भैरहेको छ । अहिले उनको अवस्था सामान्य रहेको बताइएको छ । अगामी दिनमा जिलेटिन विस्फोट गराउदा दुवै पक्षले पूर्व जानकारी दिनुपर्ने सहमती पनि गरिएको जानकारी गराईएको छ ।
भारतीय कम्पनीले क्षतिपूर्ति दिए पछि आईतबार परीक्षणका लागि जिल्ला अस्पताल दार्चुलामा राखिएको शव प्रक्रिया पूरा गरेर मृतकका आफन्तलाई जिम्मा लगाइएको जिल्ला प्रहरी कार्यालय दार्चुलाका प्रहरी निरिक्षक तथा सूचना अधिकारी राजेश शाहीले जानकारी गराउनु भयो ।
उनले आफन्तले ।बालकको शव बुझेर महाकाली घाटमा अन्त्यष्टि समेत गरी सकेको जानकारी गराउनु भयो । उनले भारतिय पक्षबाट नेपाली १६ लाख क्षेतीपूर्ति दिएको जानकारी गराउदै नेपालको तर्फबाट पनि क्षतीपूर्तीका लागी प्रकृया अगाडी बढाईएको जानकारी गराउनु भयो ।
