बैशाख २८ धनगढी । स्थानीय सेवा ऐन ल्याउन माग गर्दै सुदूरपश्चिम पदेशको मुख्यमन्त्री कार्यालय अगाडी स्थानीय सेवाका कर्मचारीहरुले धर्ना दिएका छन । प्रदेश सभामा गत माघमै दर्ता भएको विधेयक प्रदेश सभाबाट पारित गर्नुपर्ने माग राख्दै स्थानीय सेवाका कर्मचारीहरुले मुख्यमन्त्री कार्यालय अगाडी धर्ना दिएका हुन ।
बैशाख २८ गतेदेखि विधेयक पारित नहुँदा सम्म चरणबद्ध आन्दोलन गर्ने घोषणा अनुरुप आइतवार मुख्यमन्त्री कार्यालय अगाडि उनीहरुले धर्ना दिएका हुन् । बिहान ९ बजेदेखि ११ बजेसम्म मुख्यमन्त्री कार्यालय अगाडि प्रवेशद्वारमा धर्नामा बसेको संघर्ष समितिका संयोजक झलक दौल्यालले बताए ।
स्थानीय सेवा ऐन ल्याउन पटकपटक आग्रह गर्दा पनि नल्याइएकाले बाध्य भएर आन्दोलन गर्नुपरेको उनले बताए । लामो समय देखि स्थानीय सेवा ऐन ल्याउन प्रदेश सरकारलाई आग्रह गर्दै आएको बताउदै उनले गत माघमा प्रदेश सभामा दर्ता भएको विधेयक अहिलेसम्म पारित नभएको बताए ।
ऐन अभावमा वृत्ति विकास अवरुद्ध भएको बताउदै उनले स्थानीय तहको काम समेत प्रभावित भएको बताए । सरकारले आश्वासन मात्रै दिएको बताउदै उनले अत्यावश्यक सेवा बाहेकका काम ठप्प पारेर सुदूरपश्चिमका ८८ वटै स्थानीय तहका कर्मचारीहरु धनगढी आएर आन्दोलन गर्न बाध्य भएको उनले बताए ।
माग पूरा नहुँदा सम्म चरणबद्ध आन्दोलन गर्ने उनले जानकारी गराए । सुदूरपश्चिम प्रदेशका ८८ वटै स्थानीय तहका कर्मचारीहरू आन्दोलन गर्न धनगढी आइपुगेकाले सेवाग्राहीले दुख भोग्नु परेको छ ।
कर्मचारी आन्दोलनमा हुँदा सेवाग्रहीले वडाकार्यालयबाट प्रदान गरिने सेवाहरु नपाएर बञ्चित हुनु परेको हो । प्रदेश सरकारले ऐन नल्याउँदा लामो समयसम्म एउटै स्थानीय तहमा काम गर्नु परेकाले विभिन्न किसिमका हस्तक्षेप र समस्या भोग्नुपरेको उनीहरुले गुनासो गरेका छन् ।
