चैत्र २७ धनगढी । सुदूरपश्चिम प्रदेशमा जनता समाजवादी पार्टी जसपाले गठबन्धन तोडेको छ । केन्द्रमा गठबन्धन दलहरूबीच भएको सहमतिविपरीत नेपाली कांग्रेसलाई मात्रै सरकारमा सहभागी गराएर आफ्नो अपमान गरेको भन्दै जसपाले गठबन्धन तोडेको हो ।
धनगढीमा पत्रकार सम्मेलन गरी जसपाले गठबन्धन तोडेको घोषणा गरेको हो।
जसपा सुदूरपश्चिमका अध्यक्ष कृष्णकुमार चौधरीले पाँचदलीय गठबन्धन प्रदेश तथा स्थानीयस्तरमा पनि विस्तार गर्दै अगाडि बढ्ने केन्द्रबाट निर्देशन भएको बताउदै सुदूरपश्मि प्रदेशमा जसपालाई सरकारमा सहभागी नगराएर काँग्रेसलाई मात्र गराएकाले गठबन्धन तोडेको जानकारी गराए । उनले सुदूरपश्चिम प्रदेशमा गठबन्धन नहुने पनि जानकारी बताए।
नेपाली कांग्रेस, नेकपा माओवादी केन्द्र र नेकपा एकीकृत समाजवादी पार्टीले कुनै जानकारी नै नदिई कांग्रेसलाई सरकारमा सहभागी गराउँदा जसपाले अपमान भएको महसुस गरेको उनले जारी गरेको विज्ञप्तिमा उल्लेख गरिएको छ।
जसपाले प्रदेशमा स्थानीय तह निर्वाचनका लागि एक्लै लड्न सक्षम रहेको दाबी गर्दै आवश्यकता अनुसार अन्य पार्टीसँग मिलेर अगाडि बढ्न तयार रहेको उनले जानकारी गराए ।
