चैत्र ७, धनगढी । बैतडीमा मिनी ट्रक दुर्घटना हुँदा एक जनाको मृत्यु भएको छ। प्रहरीका अनुसार मृत्यु हुनेमा सुर्नया गाउँपालिका– ३ की २५ वर्षीया दुर्गा चन्द रहेकी छिन्। दुर्घटनामा घाइते भएकी उनलाई अस्पताल लैजाँदै गर्दा बाटोमै मृत्यु भएको प्रहरीले बताएको छ।
आइतबार साँझ पाटनबाट सतबाँझतर्फ जाँदै गरेको से१ख १२४२ नम्बरको मिनी ट्रक पाटन नगरपालिका– ६ स्थित सडकमा आफै अनियन्त्रित भई पल्टिएको प्रदेश ट्राफिक प्रहरी कार्यालय अत्तरियाले जनाएको छ। दुर्घटनामा अन्य ६ जना घाइते भएका छन्। सुर्नया गाउँपालिका – ३ की ३५ वर्षीया माधवी चन्द, ३५ वर्षकै बसन्ती भट्ट, ३३ वर्षीया कलावती भट्ट, २८ वर्षीया विमला चन्द, ३३ वर्षीया पार्वती विष्ट र ५० वर्षीया तारा विष्ट घाइते भएका छन्।
घाइते ६ जनामध्ये ४ जना पाटनमा उपचारपछि घर फर्किएका बताइएको छ। माधवी, विमला, पार्वती र तारा घर फर्किएका हुन् भने अन्य २ जनालाई थप उपचारका लागि जिल्ला अस्पताल डडेल्धुरा पठाइएको प्रहरीले बताएको छ।कलावती र बसन्तीलाई डडेल्धुरा पठाइएको हो। ट्रक चालक पाटन नगरपालिका–४ का वीरेन्द्र खत्री फरार रहेका र उनको खोजी भइरहेको प्रहरीले जनाएको छ।
