हिमाल नेपाली, फागुन १८ धनगढी
यही फागुन १९ देखि २१ गते सम्म तीन दिन धनगढीमा हुने नेपाली साहित्य महोत्सव २०७८ को तयारी अन्तिम चरणमा पुगेको छ ।
आज सुदूरपश्चिमाञ्चल साहित्य समाजले महोत्सवको तयारी सम्बन्धमा आयोजना गरेको पत्रकार सम्मेलनमा तयारी अन्तिम चरणमा पुगेको जानकारी गराईएको हो ।
सुदूरपश्चिमाञ्चल साहित्य समाजका अध्यक्ष रामलाल जोशीले महोत्सबको तयारी अन्तिम चरणमा पुगेको जानकारी गराउनु भएको हो । सुदूरपश्चिम प्रदेशका मुख्यमन्त्री त्रिलोचन भट्ट द्वारा उद्घाटन हुने नेपाली साहित्य महोत्सव २०७८मा देश मूर्धन्य लेखक, अध्येता, साहित्यकार, कवि, कलाकार देखि स्थानीय स्रस्टाहरुको उत्साहपूर्ण सहभागिता रहने पत्रकार सम्मेलनमा जानकारी गराईएको छ ।
भाषिक, सास्कृतिक, प्राकृतिक, विविधताले युक्त सुदूरपश्चिम प्रदेश नेपाली भाषाको माउ थलो भएर पनि उपेक्षाका कारण मुलधारमा आउन नसकेकाले सुदूरपश्चिम प्रदेशलाई पर्यटन प्रवर्द्धन गरि समृद्धिको यात्रामा अगाडी बढाउन महोत्सवले टेवा दिने विश्वास गरिएको अध्यक्ष जोशीले जानकारी गराउनु भयो ।
यस्ता साहित्यिक कार्यक्रमहरूमा सहभागी हुने स्रस्टाहरूले आख्यान, नियात्रा, निबन्ध, कविता, गीत लगायतका अनेक विधामा सदूरपश्मिलाई केन्द्रमा राखेर साहित्य सिर्जना र अध्ययन अनुसंधान गर्ने भएकाले यो महोत्सवले विशिष्ट महत्व राख्ने बताउदै उनले सबै क्षेत्रलाई सहयोगका लागि अनुरोध गर्नुभयो ।
पत्रकारहरूले राखेका जिज्ञासाहरूको जवाफ दिदै पहिलो महोत्सवमा पनि प्रदेश सरकारले सहयोग गर्नुका साथै यस क्षेत्रका केही स्थानीय तह, संघ संस्था र व्यक्तिहरूको सहयोग भएको र देश विदेश महोत्सवको सकारात्मक संदेश प्रवाह भएकोले महोत्सवलाई निरन्तरता दिनुपर्छ भन्ने लागेर दोस्रो पटक नेपाली साहित्य महोत्सव आयोजना गर्न लागेको अध्यक्ष जोशीले बताउनु भयो ।
पहिलो कार्यक्रममा देश विदेशबाट नेपाली साहित्यकारहरूलाई सहभागी गराईए पनि यसपटक कोभिडका कारण विदेशमा रहेका साहित्यकारहरूलाई सहभागी गराउन नसकिने अध्यक्ष जोशीले जानकारी गराउनु भयो ।
