फागुन ०६ कञ्चनपुर । रुख कटानको सहमति नपाउँदा महाकाली करिडोरको कामले गति लिन सकेको छैन ।
कञ्चनपुरको ब्रह्मदेव देखि १४ किलोमिटर उत्तर करिडोरको ट्रयाक खोल्न सात महिना अघि निर्माण कम्पनीसँग सम्झौता भए पनि वनले रुख कटानको आदेश नदिदा कामले गति लिन नसकेको हो ।
ब्रह्मदेवमा १४ किलोमिटर सम्म ट्रयाक खोल्न पाँच करोड रुपैयाँमा ठेक्का भए पनि वनले गर्दा समस्या भएको महाकाली करिडोर दार्चुला तिङ्कर सडक योजनाले जनाएको छ ।
महाकाली करिडोर दार्चुला तिङ्कर सडक योजनाका सवइन्जिनियर दौलत धामीले वनको सहमति बिना रुख कटान गर्न नसकिने भएको जानकारी गराउदै काम गर्न समस्या भएको बताए । महाकाली करिडोरको ट्रयाक खोल्ने जिम्मेवारी पाएको दिवा–शनिदेव जेभीका आधिकारिक प्रतिनिधि शनिदेव भट्टले लामो समय भइसक्दा पनि वनबाट रुख कटानको सहमति नपाउदा समस्या भइरहेको जानकारी गराउनु भयो ।
उनले साना र ठूला गरेर करिब चार हजार रुख काट्नु पर्ने जानकारी गराउदै रुख कटानको आदेश नपाउदा समस्या भएको बताउनु भयो । करिडोर अन्तर्गत १४ किलोमिटर ट्रयाक खुले डडेल्धुराको जोगबुढा क्षेत्र सहजै पुगिने बताउदै डडेल्धुरा क्षेत्रमा पनि करिडोरको ट्रयाक खुलाउने काम भइरहेको योजनाका सव इन्जिनियर धामीले जानकारी गराउनु भयो ।
उनले ४ सय २५ किलोमिटर लम्बाइ भएको करिडोर अन्तर्गत विभिन्न प्याकेजमा निर्माण कार्य भइरहेको जानकारी गराउदै लामो समयसम्म वातावरणीय प्रभाव मूल्याङ्कन हुन नसक्दा काममा ढिलाइ भएको जानकारी गराउनु भयो । उनले नेपाल, भारत र चीनसितको त्रिदेशीय नाका तिङ्करसम्म व्यापार विस्तारका लागि महाकाली करिडोर सडक निर्माण योजनाको अवधारणा अगाडि सारिएको बताउनु भयो ।
डडेल्धुरामा ३८ किलोमिटर सम्म ट्रयाक खुलिसकेको सवइन्जिनियर धामीले जानकारी गराउदै डडेल्धुरामा ५५ किलोमिटर ट्रयाक खोल्नु पर्नेमा ३८ किलोमिटर सम्म खुलिसकेको जानकारी गराउनु भयो ।
उनले बाँकी ट्रयाक खोल्ने ठेक्का प्रक्रियाको चरणमा रहेको जानकारी गराउनु भयो । सवइन्जिनियर धामीले बैतडीमा १५ देखि २० किलोमिटर महाकाली मार्गमा पर्ने बताउदै त्यहाँ करिब ५५ किलोमिटर ट्रयाक खुलिसकेको जानकारी गराए । अझै ६०÷७० किलोमिटर ट्रयाक खुल्न बाँकी रहेको उनले बताए ।

चारवटै जिल्लामा ट्रयाक खोल्न अहिले ५० करोड रुपैयाँ बराबरको काम भईरहेको उनले जानकारी दिए । बैतडीको पञ्चेश्वर क्षेत्रमा ५७ किलोमिटर ट्रयाक खोल्ने काम चलिरहेको बताउदै उनले त्यसका लागि १४ करोड रुपैयाँमा ठेक्का भएको जानकारी गराउनु भयो ।
उनले २७ किलोमिटर ट्रयाक खोल्न सम्झौता भइरहेको जानकारी गराउदै दार्चुला तिङ्कर सडक खण्डको कुल १ सय ३४ किलोमिटर मध्ये ८७ किलोमिटर व्यास गाउँपालिका वडा नम्बर २ कोठेधार देखि तिङ्कर सम्मको सडक निर्माणको जिम्मा नेपाली सेनाले लिएको जानकारी गराउनु भयो ।
सेनाले गरिरहेको कामको केही दिन अघि प्रधानसेना पति प्रभुराम शर्माले निरीक्षण गरेका थिए । दार्चुलाको लेकम क्षेत्रमा ट्रयाक खोल्न १० करोड रुपैयाँमा सम्झौता भएर काम भइरहेको सवइन्जिनियर धामीले जानकारी गराउनु भयो । उनले लेकम क्षेत्रमा ३४ किलोमिटर ट्रयाक खोल्ने काम भइरहेको बताउदै व्यास गाउँपालिकामा पर्ने छ किलोमिटर सडकमा अन्य संरचना निर्माणको काम भइरहेको जानकारी गराउनु भयो ।

उनले करिडोर अन्तर्गत ट्रयाक खोल्ने काम भइरहेको बताउदै सडक कालोपत्र भने कहीँ पनि नभएको जानकारी गराउनु भयो । पहिलोपटक आयोजना अन्तर्गत दार्चुलाको खलङ्गा–सुनसेरा १९ किलोमिटर र सलेती देखि बेद सम्म १२ किलोमिटर सडक कालोपत्र गर्न ठेक्का आह्वान हुने जानकारी गराउदै उनले ३१ किलोमिटर सडक कालोपत्र गर्ने तयारी भइरहेको बताउनु भयो ।