माघ १७ डोटी । सवारी चालक अनुमति पत्रका लागी डोटीको राजपुरमा निर्माण गरिएकोे ट्रायल सेन्टर अझै सञ्चालनमा आउन सकेको छैन ।
तीन महिना भित्र सञ्चालनमा ल्याउने गरी झण्डै अढाई बर्ष लगाएर निर्माण गरिएको ट्रायल सेन्टर अझै सञ्चालनमा आउन नसकेको हो ।
सुदूरपश्चिम प्रदेशका तत्कालीन भौतिक पूर्वाधार विकास मन्त्री पठानसिंह बोहराले २०७५ साल चैत १७ गते डोटीको राजपुरमा शिलान्यास गरेको ट्रायल सेन्टर अहिले सम्म सञ्चालनमा आउन नसकेको हो ।
३७ लाख ८१ हजार रुपैयाँको लागतमा निर्धारित समय भन्दा दुई बर्ष ढिला गरी ट्रायल सेन्टर गत असारमा तयार भए पनि अहिले सम्म सञ्चालनमा आउन सकेको छैन । डोटीको राजपुरस्थित यातायात व्यवस्था कार्यालयले निर्माण भइसकेको ट्रायल सेन्टरको भौतिक पूर्वाधार मन्त्रालयले समयमा निरीक्षण गरेर निर्णय नदिँदा सञ्चालनमा ल्याउन कठिनाइ भएको बताएको छ । निरीक्षण गरिदिन गत साउन ५ गते भौतिक पूर्वाधार विकास मन्त्रालयलाई पत्र पठाएको बताउदै कार्यालयका निमित्त प्रमुख भरत नेपालीले काम सम्पन्न भईसक्यो भन्दा पनि निरीक्षण गरिदिन आग्रह गर्दै पत्र पठाएको बताउनु भयो ।
उनले पटक पटक फोनमा आग्रह गरेको बताउदै अहिले सम्म निरीक्षण नभएको गुनासो गरे ।
भौतिक संरचनाको निरीक्षण भए पछि मात्रै ट्रायल लिने अनुमति प्राप्त हुने बताउदै ट्रायलको अनुमति प्राप्त भयो भने कार्यालयमा भएको जनशक्ति परिचालन गरेर सवारी चालक अनुमति पत्रको प्रक्रिया शुरु गर्न सकिने निमित्त प्रमुख नेपालीले बताउनु भयो ।
सुदूरपश्मि प्रदेश भौतिक पूर्वाधार विकास मन्त्रालयको यातायात क्षेत्र हेर्ने शाखा अधिकृत मोहनचन्द्र जोशीले डोटी र डडेल्धुरामा यसै ्आर्थिक बर्षभित्र ट्रायल सेन्टर सञ्चालनमा आउने बताएका छन ।