माघ १४ धनगढी,
धनगढीमा थप १ सय २१ जनामा कोरोना पुष्टि भएको छ । सेती प्रादेशिक अस्पताल धनगढीमा गरिएको परीक्षणमा १ सय २१ जनामा कोरोना भाइरसको पुष्टि भएको हो । पछिल्लो, २४ घण्टामा १ सय ८७ जनामा कोरोना परीक्षण गर्दा थप १ सय २१ जनामा संक्रमणको पुष्टि भएको अस्पतालका सूचना अधिकारी दिलीपकुमार श्रेष्ठले बताए ।
त्यसैगरी २४ घण्टामा एकजना नयाँ कोरोना संक्रमित अस्पताल भर्ना भएका छन् । हाल अस्पतालमा १९ जना कोरोना संक्रमित उपचाररत छन् भने ती मध्ये चारजना आइसियु र एकजना कोरोना संक्रमितको भेन्टिलेटरमा उपचार भइरहेको श्रेष्ठले जानकारी गराए ।
यसैगरि पछिल्लो २४ घण्टामा कञ्चनपुरको भिमदत्त नगरपालिका वडा नम्बर ८ तिलाचौरका ७५ वर्षीय पुरुषको सेती अस्पतालमा उपचारका क्रममा मृत्यु भएको अस्पतालले जानकारी गराएको छ ।